28 En U verlos die verdrukte volk, maar u oë is teen die hoogmoediges; U verneder hulle.
29 Want U is my lamp, o Here! En die Here laat my duisternis opklaar.
30 Want met U loop ek ’n bende storm, met my God spring ek oor ’n muur.
31 Die weg van God is volmaak; die woord van die Here is gelouter; Hy is ’n skild vir almal wat by Hom skuil.
32 Want wie is God buiten die Here, en wie ’n rots buiten onse God?
33 Die God wat my sterk toevlug is, en Hy het vir my ’n weg volkomelik uitgesoek.
34 Hy maak my voete soos dié van herte en laat my staan op my hoogtes.