8 Auā o lea tagata amiotonu, sa tigā lona loto fa‘amaoni a o nofo fa‘atasi ma i latou, i lona va‘ai atu ma fa‘alogo atu i lea aso ma lea aso ‘iā latou amio fa‘alētaupulea.
9 ‘Ua silafia e le Ali‘i se mea e lavea‘i mai ai i ē amio Atua a‘i le tofotofoga, ‘ae tāofi i ē amio leaga e o‘o i le aso fa‘amasino ‘ina ‘ia fa‘asalaina i latou.
10 ‘Ae maise lava i latou o ē mulimuli atu i la le tino i le tu‘inanau i le fia ulavale, ma latou ta‘ufa‘atauva‘a i le pule.‘Ua fa‘amalosi, ‘ua fīnau vale, ma ‘ua lē fefe ‘ona ‘upu leaga i ē ‘ua mamalu.
11 A o agelu e sili ‘ona malosi ma le mana, e lē molimau lava sē ‘upu leaga e fa‘asala ai ‘iā te i latou i luma o le Ali‘i.
12 A o i latou nei, fa‘apei o mea ola e tutupu ma le lē o i ai se mafaufau, na faia ‘ina ‘ia pu‘ea ma fasimatea, latou te fāifai i mea latou te lē iloa, e fano lava i latou i lo latou lava leaga,
13 e maua e i latou le taui o le amioletonu; e fa‘apea lava i latou, o le mea e fiafia ai le amio matagā i le ao, o ila i latou ma mea e ponā ai, o lo‘o pisapisaō i o latou tu‘inanau vale, ‘ina o fai faigā‘ai i latou fa‘atasi ma ‘outou.
14 ‘Ua tūtūmu o latou mata i le fafine mulilua, e lē mafai fo‘i ‘ona mapu i le agasala, latou te maileia tagata ‘ua lē fa‘atumauina, o ‘iā te i latou le loto ‘ua masani i le matape‘ape‘a, o tagata ‘ua fa‘afanoina.