13 Koning Salomo het Hiram van Tirus in diens geneem.
14 Hy was ’n vakman in bronswerk. Hy het oor die vaardigheid, begrip en kennis beskik om enigiets te maak wat aan hom opgedra was. Sy ma was ’n weduwee uit die stam Naftali en sy pa was ’n vakman in bronswerk uit Tirus.
15 Hiram het twee bronspilare gegiet, elkeen nege meter hoog en ses meter in omtrek.
16 Hy het ook twee kapitele uit brons gegiet om bo-op die pilare te sit. Elkeen was twee en ’n half meter hoog.
17 Elke kapiteel was versier met sewe stelle ineengevlegte kettings.
18 Hy het ook twee rye granate gemaak wat rondom die netwerke gegaan het om die kapitele te verfraai. Dit het hy met elke kapiteel gedoen.
19 Die kapitele op die pilare in die voorportaal was in die vorm van blomkelke. Hulle was twee meter hoog.