1 Gibahin sa pipila ka pundok ang mga kaliwat ni Aaron. Ang mosunod mao ang mga anak ni Aaron: si Nadab, si Abihu, si Eleazar ug si Itamar.
2 Unang namatay si Nadab ug si Abihu kay sa ilang amahan ug wala silay anak, busa si Eleazar ug si Itamar nahimong mga pari.
3 Uban sa tabang ni Sadok nga kaliwat ni Eleazar ug ni Ahimelec nga kaliwat ni Itamar, gibahin ni David ang mga kaliwat ni Aaron sumala sa gimbuhaton nga gigahin alang kanila.
4 Tungod kay mas daghan man ang lalaking pangulo sa mga kaliwat ni Eleazar kay sa mga kaliwat ni Itamar, ang kaliwat ni Eleazar gibahin sa 16 ka grupo ug ang kaliwat ni Itamar sa walo ka grupo.
5 Gibahin sila sa samang gidaghanon pinaagi sa ripa kay sila mga opisyal man sa Dapit nga Balaan ug sa Dios gikan sa banay ni Eleazar ug ni Itamar.