5 Hibaloi ninyo nga ingon nga pantonon sa usa ka amahan ang iyang anak, pantonon usab kamo sa Ginoo nga inyong Dios.
6 Busa tumana ang iyang mga sugo ug sunda ang iyang kabubut-on ug kahadloki siya
7 kay dad-on kamo niya ngadto sa usa ka tabunok nga yuta nga daghag mga suba ug mga tubod nga nag-agas sa kawalogan ug kabungtoran,
8 yuta nga daghag trigo, sebada, ubas, igos, granada, olibo ug dugos.
9 Yuta kini diin dili kamo gutomon ug walay makulang kaninyo, diin makakuha kamog puthaw gikan sa mga bato ug makaminag tumbaga sa kabukiran.
10 Mangaon kamo ug mangabusog ug pasalamatan ninyo ang Ginoo nga inyong Dios tungod sa maayong yuta nga gihatag niya kaninyo.
11 “Ayaw gayod ninyo kalimti ang Ginoo nga inyong Dios. Tumana gayod ang tanan niyang mga sugo nga gihatag ko karon kaninyo.