21 Misugot si Moises nga didto mopuyo sa ila ni Reuel, ug unya, gipaasawa ni Reuel kaniya ang iyang anak nga si Zipora.
22 Namabdos si Zipora ug nanganak ug lalaki. Ginganlan kini ni Moises ug Gershom, kay ingon niya, “Usa ako ka langyaw niining dapita.”
23 Human sa daghang katuigan, namatay ang hari sa Ehipto. Apan nagpadayon pa gihapon ang pag-antos sa mga Israelinhon sa ilang pagkaulipon. Nangayo sila ug tabang, ug miabot kini sa Dios.
24 Nadungog sa Dios ang ilang mga pag-agulo, ug gihinumdoman niya ang iyang kasabotan kang Abraham, Isaac, ug kang Jacob.
25 Nakita sa Dios ang ilang kahimtang ug nalooy gayod siya kanila.