18 Cognita autem Jesus nequitia eorum, ait : Quid me tentatis, hypocritæ ?
19 ostendite mihi numisma census. At illi obtulerunt ei denarium.
20 Et ait illis Jesus : Cujus est imago hæc, et superscriptio ?
21 Dicunt ei : Cæsaris. Tunc ait illis : Reddite ergo quæ sunt Cæsaris, Cæsari : et quæ sunt Dei, Deo.
22 Et audientes mirati sunt, et relicto eo abierunt.
23 In illo die accesserunt ad eum sadducæi, qui dicunt non esse resurrectionem : et interrogaverunt eum,
24 dicentes : Magister, Moyses dixit : Si quis mortuus fuerit non habens filium, ut ducat frater ejus uxorem illius, et suscitet semen fratri suo.