5. Mosebok

² Den dagen de går over Jordan og til det landet Herren din Gud gjev deg, skal du reisa nokre store steinar og stryka kalk på dei. ³Når du kjem over, skal du skriva alle orda i denne lova på dei. Då skal du få koma inn i det landet Herren din Gud vil gje deg, eit land som fløymer med mjølk og honning, slik som Herren, dine fedrars Gud, lova deg. ⁴ Når de kjem over Jordan, skal de på Ebal-fjellet reisa desse steinane slik eg byd dykk i dag, og du skal stryka kalk på dei. ⁵ Der skal du byggja eit altar for Herren din Gud, eit altar av stein. Bruk ikkje meisel på dei! ⁶Altaret for Herren din Gud skal du byggja av steinar som ikkje er hogne til. På det skal du bera fram brennoffer for Herren din Gud. ⁷Så skal du ofra fredsoffer og eta der og gleda deg for Herren din Guds andlet. ⁸Og på steinane skal du klårt og greitt skriva alle orda i denne lova.