26 И прискорбен быв царь, клятвы (же) ради и за возлежащих с ним не восхоте отрещи ей.
27 И абие послав царь спекулатора, повеле принести главу его.
28 Он же шед усекну его в темнице, и принесе главу его на блюде, и даде ю девице: и девица даде ю матери своей.
29 И слышавше ученицы его, приидоша и взяша труп его, и положиша его во гробе.
30 И собрашася апостоли ко Иисусу и возвестиша ему вся, и елика сотвориша, и елика научиша.
31 И рече им: приидите вы сами в пусто место едини и почийте мало. Бяху бо приходящии и отходящии мнози, и ни ясти им бе когда.
32 И идоша в пусто место кораблем едини.