3 ‘Ou te fa‘aumatia le fa‘amasino o i lea mea, ‘ou te fasiotia fa‘atasi ma ia o ali‘i uma, o lo‘o fetalai mai ai le ALI‘I.
4 O lo‘o fa‘apea mai le ALI‘I: E tolu agasala a Iuta, e fa fo‘i, ‘ou te lē liliu ‘ese ai lana sala auā na latou lafoa‘i le tulafono a le ALI‘I, e le‘i tausi fo‘i e i latou ana poloa‘iga; ‘ua fa‘asesēina i latou ‘iā latou mea pepelo, sa naunau atu i ai o latou tamā.
5 ‘Ae ‘ou te tu‘uina atu le afi i Iuta, e fa‘aumatia ai maota o Ierusalema.
6 O lo‘o fa‘apea mai le ALI‘I: E tolu agasala a Isaraelu, e fa fo‘i, ‘ou te lē liliu ‘ese ai lana sala; auā na latou fa‘atauina atu lē ‘ua amiotonu i ario ma lē ‘ua mativa i se‘evae e lua.
7 O ē naunau atu i le efuefu o le lau‘ele‘ele i ulu o ē matitiva ma latou liliu ‘ese le ala o ē agamalū e alu ane fo‘i le tagata ‘atoa ma lona tamā i le teine e to‘atasi, ‘ina ‘ia ta‘uvaleina ai lo‘u igoa pa‘ia.
8 ‘Ua latou ta‘o‘oto fo‘i i ‘ofu ‘ua tau fa‘afa‘atau i tafatafa o fatafaitaulaga uma ma ‘ua latou inu uaina ‘ae ‘ua fa‘asalaina i le fale o latou atua.
9 A o a‘u, na ‘ou fa‘aumatia le sa Amorī a‘i o latou luma, o lona maualuga e pei o le maualuga o arasi ia, sa malosi fo‘i o ia e pei o aluna na ‘ou fa‘aumatia fo‘i lona fua i luga ma ona a‘a i lalo.