2 ‘Ia ‘outou ō atu i Kalene, ma va‘ava‘ai atu i le tou ō atu ai i Amato tele; i le ō ifo ai i Kata i Filisitia; e sili ‘ea lo latou lelei i nā mālō, pe sili ‘ea ‘ona tele o lo latou lau‘ele‘ele i lo ‘outou lau‘ele‘ele?
3 Talofa i ē ‘ua manatu ‘ua mamao le aso vale ma fa‘alatalata mai le nofoa o i ai le fa‘asauā;
4 o ē ta‘o‘oto i moega nifo elefane ma latou ta‘o‘oto i o latou moega ma ‘a‘ai i tama‘i mamoe o le lafu ma tama‘i povi a‘i le fale povi;
5 o ē pepese fa‘atasi ma le leo o le napeli ma latou sauni mo i latou la‘aupese, e pei o Tavita;
6 o ē inu uaina i ipu tetele ma u‘u ‘iā te i latou i u‘u e sili ‘ona lelei; a ‘ua lē tigā i latou ‘ona o le malaia o Iosefa.
7 O le mea lea e tāfea i ai nei i latou, e muamua i ē tāfea, e mavae atu le ‘alaga fiafia o ē ta‘o‘oto.
8 ‘Ua tautō le Ali‘i le ATUA i lona soifua, o lo‘o fetalai mai ai le ALI‘I le Atua o ‘au: ‘Ua ‘ou ‘ino‘ino i le mamalu o Iakopo, ‘Ua ‘ou ‘ino‘ino fo‘i i ona maota; o le mea lea ‘ou te tu‘uina atu ai le ‘a‘ai ‘atoa ma mea ‘ua tumu ai.