Bakolose

⁶Ke ka baka la ntho tseo bohale ba Modimo bo tlang hodima bana ba ho se dumele. ⁷Ke tseo le lona le neng le tsamaya ho tsona pele, ha le ne le sa phela ka tsona. ⁸Empa jwale, lahlang le lona, ntho tseo kaofela, e leng bohale, le ho itshena, le lonya, le dinyefolo; mme polelo e dihlong e se ke ya tswa melomong ya lona. ⁹Le se ke la thetsana ka mashano; le hlobole motho wa kgale le diketso tsa hae; ¹⁰mme le apare motho e motjha, ya ntjhafallang tsebong ka setshwantsho sa ya mmopileng. ¹¹Mona, ha ho Mogerike, leha e le Mojuda, leha e le lebollo, leha e le boqai, leha e le mobarebare, leha e le Moskitha, leha e le ya ruilweng, leha e le ya sa ruwang; empa Kreste e le ntho tsohle, le ho bohle. ¹²Le apare ke hona, kaha le le bakgethwa ba Modimo, ba halalelang, ba ratwang, maikutlo a mohau, a molemo, a boikokobetso, a bonolo, a mamello.