1 Johanne

⁷Banabeso, ha ke le ngolle taelo e ntjha, empa e ntse e le taelo ya kgale eo e sa leng le na le yona le ho qaleng; taelo eo ya kgale ke lentswe leo le le utlwileng esale ho qaleng. ⁸Ke boela ke le ngolla taelo e ntjha, e leng nnete ho yena le ho lona; hobane lefifi le a feta, mme lesedi la nnete le se le hlahile. ⁹Ya bolelang hore o leseding, athe o hloile ngwanabo, o sa le lefifing le jwale. ¹⁰Ya ratang ngwanabo, o dutse leseding, mme ha ho letho ka ho yena le mo kgopisang. ¹¹Empa ya hloileng ngwanabo, o lefifing, mme o tsamaya lefifing, mme ha a tsebe moo a yang teng, kahobane lefifi le foufaditse mahlo a hae. ¹²Bana, ke a le ngolla, kahobane le tshwaretswe dibe ka baka la lebitso la hae. ¹³Bontate, ke a le ngolla, kahobane le tseba ya leng teng esale ho qaleng. Ba batjha, ke a le ngolla, kahobane le hlotse e mobe.