1 Johanne

³Hobane ho rata Modimo, ke ha re boloka ditaelo tsa wona, mme ditaelo tsa wona ha di boima. ⁴Hobane hohle ho tswetsweng ke Modimo ho hlola lefatshe, mme hlolo e hlotseng lefatshe ke tumelo ya rona. ⁵Ke mang ya hlolang lefatshe, haese ya dumelang hobane Jesu ke Mora wa Modimo? ⁶Jesu Kreste ke yena ya tlileng ka metsi le ka madi; e seng ka metsi feela, empa e le ka metsi le ka madi. Mme Moya ke wona paki; hobane Moya ke nnete. ⁷Hobane ho le ba bararo bao e leng dipaki: ⁸Moya, le metsi, le madi; mme tse tharo tseo di paka ntho e le nngwe. ⁹Haesita le bopaki ba batho re bo amohela, bopaki ba Modimo bo fetisa ka boholo; mme ke bona boo bopaki boo Modimo o pakileng Mora wa wona ka bona.