Johanne

³⁶Ha le sa ntse le ena le lesedi, dumelang ho lesedi, le tle le fetohe bana ba lesedi.Jesu a bolela taba tseo, a ntoo tloha, a ipatela bona. ³⁷Leha a ne a entse mehlolo e kalo pontsheng ho bona, ba ne ba sa dumele ho yena; ³⁸hore ho tle ho etsahale polelo ya moporofeta Esaia, ha a re: Morena, ke mang ya dumetseng seo a se utlwileng ho rona? Mme letsoho la Morena le bonahetse ho mang? ³⁹Ka baka leo, ba ne ba sitwa ho dumela, hobane Esaia o boetse a re: ⁴⁰O foufaditse mahlo a bona, mme o ba thatafaditse dipelo, hore ba se ke ba bona ka mahlo, ba se ke ba utlwisisa ka dipelo, ba se ke ba sokoloha, mme ke se ke ka ba fodisa. ⁴¹Esaia o boletse taba tseo, mohla a bonang kganya ya hae, mme a bolela tsa hae. ⁴²Leha ho le jwalo, ba bangata, le hara baholo, ba dumela ho yena; empa ba ne ba sa ipolele ka baka la bafarisi, esere ba lelekwa sinagogeng;