Johanne

⁵Setlolo seo se ne se sa rekeleng didenare tse makgolo a mararo, tsa newa bafumanehi na? ⁶A rialo, e seng kahobane a ne a hlokomela bafumanehi, empa e le kahobane e ne e le leshodu; ke yena ya neng a na le mokotlana wa ditjhelete, mme o ne a inkela se kenngwang teng. ⁷Empa Jesu a re: Mo lese; o se boloketse letsatsi la ho epelwa ha ka. ⁸Hobane haele bafumanehi, le tla nne le be le bona kamehla; empa nna, le ke ke la ba le nna kamehla. ⁹Bajuda ba bangata haholo ba utlwa hore o hona moo, mme ba tla, e seng ho bona Jesu feela, ba tla le ho bona Lasaro eo a neng a mo tsositse bafung. ¹⁰Baprista ba baholo ba mpa ba rera hammoho ho bolaya le yena Lasaro. ¹¹Hobane Bajuda ba bangata ba ne ba ba tlohela ka baka la hae, mme ba ne ba dumela ho Jesu.