Johanne

⁴³Eitse ha matsatsi a mabedi a fetile, a tloha teng, a ya Galelea. ⁴⁴Hobane le yena Jesu o ne a boletse, a re: Moporofeta ha a bokwe naheng ya habo. ⁴⁵Eitse ha a fihla Galelea, Bagalelea ba mo amohela, kahobane ba ne ba bone tsohle tseo a di entseng Jerusalema mohla mokete; hobane le bona ba ne ba ile moketeng. ⁴⁶Jesu a boela a tla Kana wa Galelea, moo a neng a fetotse metsi veine. Mme kgosana e ne e le teng, eo mora wa yona a kulang Kapernauma. ⁴⁷Monna eo eitse ha a utlwa hobane Jesu o fihlile Galelea, a etswa Judea, a tla ho yena, a mo rapela, a re, a theohe, a ye ho fodisa mora wa hae; hobane o ne a se a le makgatheng a ho shwa. ⁴⁸Yaba Jesu o re ho yena: Ha le sa bone mehlolo le meeka, ha le ke le dumela. ⁴⁹Kgosana ya re ho yena: Morena, ako theohe, ngwana ka a eso ho shwe.