Johanne

¹⁸Ya iqallang tsa hae o ipatlela thoriso ya hae; empa ya batlang thoriso ya ya mo romileng, ke yena e leng wa nnete, mme bokgopo ha bo yo ho yena. ¹⁹Ha ke re, Moshe o le neile molao na? Leha ho le jwalo, ha ho e mong wa lona ya phethang molao. Le batlelang ho mpolaya? ²⁰Bongata ba mo araba, ba re: O na le motemona; ke mang ya batlang ho o bolaya? ²¹Jesu a ba araba, a re: Ke entse mosebetsi o le mong, mme le maketse kaofela ke wona. ²²Moshe o le file lebollo — hase hore le tswa ho Moshe, empa le tswa ho bontate moholo, — mme le bolotsa motho ka Sabatha. ²³Na ha motho a bolotswa ka Sabatha, ho tle ho se ke ha tlolwa molao wa Moshe, le nkgalefetse keng ha ke fodisitse motho kahohle Sabatha na? ²⁴Se ahloleng ka ho bona feela, le mpe le ahlole ka kahlolo e lokileng.