11 Ho ne ho ena le mohlapehadi wa dikolobe o neng o fula mosikong wa thaba.
12 Meya e ditshila ya mo kopa, ya re: “Re romele dikolobeng, e le hore re kene ka ho tsona.”
13 A e dumella, yaba meya e ditshila e a tswa, e kena ka dikolobeng. Mohlape oo, o neng o ka etsa dikete tse pedi, wa tsubella selomong, wa itihela letsheng, mme wa kgangwa ke metsi.
14 Badisa ba dikolobe ba baleha ho ya beha ditaba tsena motseng le metsaneng, mme batho ba tla ho tla bona se etsahetseng.
15 Ba tla ho Jesu, mme ba bona monna ya neng a ena le lebotho la bademona a dutse, a apere, kelello ya hae e tsitsitse hantle, mme ba tshoha.
16 Ba boneng ba ba bolella se etsahetseng ho ya neng a ena le modemona le ka dikolobe.
17 Yaba ba qala ho rapela Jesu hore a tswe naheng ya bona.