1 Die Here het vir Moses gesê:
2 “Jy moet vir die Israeliete sê hulle moet vir jou skoon olyf-olie bring sodat die lampe op die lampstaander altyd kan brand.
3 Aäron moet die lampstaander neersit voor die gordyn in die tent waar die Here aan die Israeliete verskyn. Die kis waarin die tien gebooie is, staan agter die gordyn. Die lampe moet van die aand tot die oggend voor die Here brand. Julle nageslag moet dit ook altyd doen.
4 Aäron moet die lampe op die goue lampstaander sit, dit moet altyd daar voor die Here wees.”
5 “Jy moet van die beste meel neem en jy moet twaalf ringbrode bak. Jy moet twee tiendes van ’n efa meel gebruik vir elke ringbrood.
6 Dan moet jy die brood in twee rye neersit op die goue tafel voor die Here, in elke ry moet daar ses brode wees.
7 Jy moet skoon wierook by elke ry sit. Die wierook is ’n vuur-offer vir die Here, dit is in die brood se plek.
8 Die priesters moet elke Sabbatdag nuwe brood neersit voor die Here. Die Israeliete moet dit altyd doen.
9 Aäron en sy seuns mag die brood kry wat op die tafel was. Hulle moet dit op ’n gewyde plek eet. Die brood is hoog-gewyd. Die priesters moet altyd daardie brood kry uit die offers vir die Here. Dit moet altyd so wees.”
10-11 Daar was ’n man, hy was die seun van ’n Israelitiese vrou en ’n Egiptiese man. Sy ma was Selomit, dogter van Dibri, sy was van die Dan-stam. Hy het baklei met ’n Israelitiese man. Die seun van die Israelitiese vrou en die Egiptiese man het die Naam van die Here gelaster toe hy die ander man wou vervloek. Hulle het hom na Moses toe gebring.
12 Hulle het die man toegesluit, hulle wou eers hoor wat die Here sê.
13 Die Here het vir Moses gesê:
14 “Jy moet die man wat die ander man vervloek het, wegneem uit die kamp. Almal wat gehoor het wat hy gesê het, moet hulle hande op sy kop sit, en die hele volksvergadering moet hom doodgooi met klippe.
15 Jy moet vir die Israeliete sê: Elke persoon wat sy God vervloek, is skuldig, julle moet hom straf.
16 Iemand wat die Naam van die Here laster, moet sterf, die hele volksvergadering moet hom doodgooi met klippe. Mense wat die Naam van die Here laster, vreemdelinge of Israeliete, moet sterf.
17 ’n Persoon wat ’n ander mens doodmaak, moet sterf.
18 Wanneer iemand ’n dier van iemand anders doodmaak, dan moet hy betaal, hy moet vir die eienaar ’n ander dier gee.
19 Wanneer ’n persoon iemand anders seermaak, dan moet hulle dieselfde doen, hulle moet hom ook so seermaak.
20 Die straf is: As hy die man seergemaak het, dan moet julle hom ook seermaak, ’n oog vir ’n oog en ’n tand vir ’n tand. Hulle moet dieselfde aan hom doen wat hy aan ’n ander mens gedoen het.
21 Iemand wat ’n dier doodmaak, moet betaal, maar iemand wat ’n mens doodmaak, moet sterf.
22 Dit moet dieselfde wet vir almal wees, vir vreemdelinge en vir Israeliete, want Ek is julle God die Here.”
23 Moses het dit vir die Israeliete gesê, en hulle het die man wat gelaster het, weggeneem uit die kamp en hulle het hom doodgegooi met klippe. Die Israeliete het gedoen wat die Here vir Moses gesê het.