1 Sa ikaduhang tuig sa paghari ni Joas nga anak ni Joacas didto sa Israel, si Amasias nga anak ni Joas misugod paghari sa Juda.
2 Sa pagsugod niyag hari 25 ang iyang panuigon ug naghari siya didto sa Jerusalem ug 29 ka tuig. Ang iyang inahan mao si Joadan nga taga-Jerusalem.
3 Matarong siya sa atubangan sa Ginoo. Hinuon dili siya sama kamatinud-anon kang David sa iyang pag-alagad sa Ginoo kay gisunod man niya ang tanang gibuhat sa iyang amahan nga si Joas.
4 Wala niya gub-a ang mga halaran sa mga diosdios ug nagpadayon ang katawhan sa paghalad ug mga mananap ug sa pagsunog ug insenso didto.
5 Sa dihang nakasukad na siya sa iyang pagkahari, gipamatay niya ang mga tawo nga nagpatay sa iyang amahan.
6 Hinuon wala niya iapil pagpatay ang ilang mga anak kay sumala sa nahisulat sa basahon sa Balaod ni Moises, ang Ginoo nag-ingon man, “Kinahanglan nga ang mga ginikanan dili patyon tungod sa sala sa ilang mga anak ug ang mga anak dili usab patyon tungod sa sala sa ilang mga ginikanan. Ang tawo patyon lamang tungod sa iyang kaugalingong sala.”
7 Si Amasias nakapatay ug 10,000 ka taga-Edomea didto sa Walog sa Asin ug giilog niya ang Sela ug iya kining ginganlag Jokteel ug hangtod karon mao kini ang ngalan sa maong dapit.
8 Unya si Amasias nagsugog mga tawo sa pag-adto kang Joas nga hari sa Israel kay buot siyang magkaatubangay sila.
9 Apan ang hari sa Israel midumili niini ug nagtugon sa mga sinugo nga sultihan nila si Amasias niining mosunod: “May sampinit sa Lebanon nga nag-ingon sa usa ka kahoyng sidro sa bukid sa Lebanon, ‘Ipaasawa ang imong anak sa akong anak.’ Apan miagi ang usa ka ihalas nga mananap ug gitunobtunoban niya ang maong sampinit.
10 Nabuntog mo ang Edomea ug tungod niana gitugkan kag garbo. Angay kang matagbaw sa imong kadaogan ug magpuyo sa inyo. Nganong mangita ka mag kasamok aron mahisugamak ka hinuon sa kadaot lakip ang tibuok Juda?”
11 Apan wala kini tagda ni Amasias busa gisulong siya ni Joas ug nagkasangka sila didto sa Betsemes nga sakop sa Juda.
12 Naparot sa Israel ang Juda ug ang taga-Juda nanagan pauli sa ila.
13 Nadakpan ni Joas si Amasias. Unya miadto si Joas sa Jerusalem ug gilumpag niya ang mga kota niini gikan sa ganghaan nga ginganlag Ganghaan ni Efraim kutob sa ganghaan nga ginganlag Ganghaan sa Eskina. Ang gitas-on sa iyang naguba sa kota sa Jerusalem 200 ka metro.
14 Ug iyang gikuha ang tanang bulawan, salapi ug mga galamiton nga iyang nakaplagan didto sa Templo sa Ginoo ug sa lawak-tipiganan sa bahandi sa palasyo sa hari ug iya kining gidala ngadto sa Samaria lakip ang iyang mga dinakpan.
15 Ang tanang nahimo ni Joas lakip ang iyang pagpakiggubat kang Amasias nga hari sa Juda nahisulat sa Kasaysayan sa mga Hari sa Israel.
16 Unya namatay si Joas ug gilubong didto sa Samaria tipon sa mga hari sa Israel. Ang mipuli kaniya paghari mao ang iyang anak nga si Jeroboam II.
17 Si Amasias nagpabiling buhi sulod sa 15 ka tuig human mamatay si Joas, ang hari sa Israel nga anak ni Joacas.
18 Ang tanang nahimo ni Amasias nahisulat sa Kasaysayan sa mga Hari sa Juda.
19 Nagplano ang katawhan sa pagpatay kaniya, busa milayas siya ngadto sa Lakis. Apan giagpas ug gipatay nila siya didto.
20 Unya gikarga nila siya sa kabayo ug gidala balik sa Jerusalem ug gilubong didto.
21 Unya gikuha sa tibuok katawhan sa Juda ang iyang anak nga si Uzias ug gihimo nilang hari puli sa iyang amahan. Si Uzias nagpanuigon ug 16.
22 Siya maoy nagtukod sa Elat ug nag-uli niini ngadto sa Juda human mamatay ang iyang amahan.
23 Sa ika-15 nga tuig sa paghari ni Amasias sa Juda, si Jeroboam nga anak ni Joas nagsugod paghari sa Israel didto sa Samaria, ug naghari siya sulod sa 41 ka tuig.
24 Daotan siyag binuhatan atubangan sa Ginoo ug gisunod niya ang tanang daotang buhat ni Jeroboam, ang anak ni Nebat nga nakaangin sa Israel sa pagpakasala.
25 Gitukod niya pag-usab ang mga utlanan sa Israel gikan sa Agianan sa Hamat hangtod sa Dagat nga Patay. Mao kini ang mando sa Ginoo, ang Dios sa Israel, pinaagi sa iyang alagad nga si propeta Jonas nga anak ni Amitai nga taga-Gat nga sakop sa Ofir.
26 Nakita sa Ginoo nga ang tibuok Israel, ulipon ug dili ulipon, nag-antos sa hilabihang kalisod ug wala silay kadangpan.
27 Hinuon, wala mag-ingon ang Ginoo nga puohon niya ang Israel busa giluwas niya sila pinaagi kang Jeroboam II nga anak ni Joas.
28 Ang tanang nabuhat ni Jeroboam II, lakip ang iyang pagpakiggubat ug pag-ilog sa Damasco ug sa Hamat nga mga siyudad nga sakop sa Juda, nahisulat sa Kasaysayan sa mga Hari sa Israel.
29 Namatay si Jeroboam II ug gilubong tipon sa iyang katigulangan nga mga hari sa Israel. Si Zacarias nga iyang anak maoy mipuli kaniya sa paghari.