17 Apan sa dihang nagpunay silag aghat kaniya, misugot na lamang siya. Busa nanglakaw sila ug sulod sa tulo ka adlaw gipangita nila si Elias apan wala nila siya makaplagi.
18 Ug sa pagbalik nila kang Eliseo nga nagpaabot kanila didto sa Jerico, siya miingon kanila, “Dili ba gidid-an ko man kamo sa pag-adto?”
19 Ang mga tawo sa siyudad miingon kang Eliseo, “Maayong puy-an kining siyudara sumala sa imong nakita apan ang tubig dili maayo ug ang mga nagmabdos sagad nga makuhaan.”
20 Si Eliseo miingon, “Dad-i akog bag-ong panaksan ug butangi kinig asin.” Busa gidad-an siyag bag-ong panaksan.
21 Unya miadto siya sa tuboran sa tubig ug gisaliyab niya ang asin ngadto sa tuboran ug miingon siya, “Nag-ingon ang Ginoo, ‘Gihimo ko nang maayo kining tubiga. Dili na kini makamatay o makakuha sa gimabdos.’”
22 Busa ang tubig maayo nang imnon hangtod niining panahona sumala sa giingon ni Eliseo.
23 Unya miadto si Eliseo sa Betel. Samtang nagpanaw siya, may pipila ka batang lalaki nga nanggula sa siyudad ug mibugalbugal kaniya. Sila miingon, “Pahawa dinhi, upaw! Uy, upaw, pahawa!”