1 Karon, mga taga-Jerusalem, andama ninyo ang inyong mga sundalo kay gilibotan kamo sa kaaway. Hampakon nila ug baston ang nawong sa pangulo sa Israel.
2 Miingon ang Ginoo, “Ikaw, Betlehem Efrata, dili kaayo importante nga lungsod sa Juda. Apan magagikan kanimo ang usa ka tawo nga magaalagad kanako isip pangulo sa Israel, kansang mga katigulangan inila nga mga tawo sa unang panahon.”
3 Busa itugyan sa Ginoo ngadto sa mga kaaway ang katawhan sa Israel hangtod sa panahon nga manganak ug batang lalaki nga maoy mangulo sa Israel ang babayeng nagabati. Ug ang iyang mga kadugo nga nabihag sa ubang dapit magabalik ngadto sa ilang isigka-Israelinhon.
4 Magadumala kining maong pangulo ug atimanon niya ang katawhan sa Israel sama sa usa ka magbalantay sa mga karnero. Himuon niya kini pinaagi sa kusog ug gahom sa Ginoo nga iyang Dios. Ug magakinabuhi ang iyang katawhan nga walay gikahadlokan tungod kay ilhon sa mga tawo sa tibuok kalibotan ang iyang pagkagamhanan.
5 Hatagan usab niya ug maayo nga kahimtang ang iyang katawhan.Kon sulongon sa mga taga-Asiria ang atong yuta ug sudlon nila ang lig-ong mga bahin sa atong lungsod, makiggira kita kanila nga pinangulohan sa maisog nato nga mga pangulo.
6 Pildihon nila ug dumalahan ang Asiria, ang yuta ni Nimrod, pinaagi sa ilang mga hinagiban. Luwason nila kita kon sulongon sa mga taga-Asiria ang atong yuta.
7 “Ang nangahibiling mga Israelinhon magadala ug panalangin sa daghang mga nasod. Mahimo silang sama sa tun-og ug ulan nga ginapadala sa Ginoo sa pagpatubo sa mga tanom. Magasalig sila sa Dios ug dili sa tawo.
8 Apan magadala usab sila ug kalaglagan sa mga nasod. Mahisama sila sa liyon — taliwala sa mga mananap sa kalasangan ug sa panon sa mga karnero sa sabsabanan — nga moyatak-yatak ug mokunis-kunis kanila, ug wala gayoy makalingkawas.
9 Magmadaogon ang mga Israelinhon batok sa ilang mga kaaway. Laglagon gayod nila silang tanan.”
10 Miingon ang Ginoo ngadto sa mga Israelinhon, “Sa umaabot nga mga adlaw, ipapatay ko ang inyong mga kabayo ug gub-on ko ang inyong mga karwahe.
11 Gub-on ko usab ang inyong mga lungsod apil na ang pinarilan nga mga lungsod.
12 Wagtangon ko ang inyong mga anting-anting ug ang inyong mga manalagna.
13 Dili na kamo makasimba sa mga imahen ug sa sagrado nga mga bato nga inyong gihimo, kay gub-on ko kini.
14 Pangibton ko ang mga poste nga simbolo sa diosa nga si Ashera. Ug gun-obon ko ang inyong mga lungsod.
15 Sa akong labihan nga kasuko, manimalos ako sa mga nasod nga wala motuman kanako.”