1 Mburuvicha guasu Astiages omano rire, ojupi hendaguépe Ciro, tetã Persia pegua.
2 Daniel rehe ojerovia iterei mburuvicha guasu, ha upévare ohayhuve chupe opa iñirũ nguéragui.
3 Umi Babiloniagua oguereko peteĩ Tupã hérava Bel. Chupe ojereraha jepi opa ára 600 kílo rupi trígo ku'i iporãvéva, 40 ovecha ha 200 lítro kaguy.
4 Mburuvicha guasu Ciro oguerohorýva pe ta'ãnga ha ohóva jepi omomba'e guasu ára ko'ẽre. Daniel katu omomba'e guasu Tupãme.
5 Peteĩ jey mburuvicha guasu he'i chupe:—Mba'ére piko neremomba'e guasúi Bélpe?Daniel he'i chupe:—Che namomba'e guasúi ta'ãngápe, yvypóra rembiapokue. Amomba'e guasu Tupã oikovévape, ojapo vaekue yvy ha yvága, ha oĩva opa oikovéva ári.
6 Mburuvicha guasu he'i chupe:—Nde piko reimo'ã Bel ndaha'eiha Tupã oikovéva? Nderehechái piko mba'éichapa okaru ha ho'u kaguy, opa ára?
7 Daniel ipukapo ha he'i chupe:—Ani reheja ne mbotavy hikuái, che ruvicha guasu. Hyepy guio pe ta'ãnga ñai'ũ hína, ijape katu vrónse. Pévako ndaikatúi ho'u mba'eve.
8 Mburuvicha guasu ipochy eterei. Ohenoika Bel pa'i kuérape, ha he'i chupe kuéra:—Ndapejéi ramo chéve mávapa ho'u ko tembi'u, pemanóta. Pehechauka ramo chéve Belha upe ho'úva katu, Daniel omanóta ojahéi haguére Bel rehe.
9 Daniel he'i mburuvicha guasúpe:—Tojejapo katu nde ereháicha, che ruvicha.Bel pa'i kuéra 70 vaekue, upéi oĩ hembireko ha imitã nguéra.
10 Mburuvicha guasu Ciro ha Daniel oho Bel tupaópe.
11 Umi pa'i he'i chupe:—Ore ruvicha guasu, ore rosẽta ko'águi ko'agãite voi, ha rohejáta ndéve remoĩ haguã nde voi, pe tembi'u ha kaguy. Upéi emboty ágã pe okẽ, ha eheja hese ne kuãirũmbore ani haguã avave oipe'a. Reju jeývo pyhareve, ha rejuhu ramo Bel ndo'úi hague pe tembi'u, romanóta. Ho'u ramo katu, Daniel pe omano vaerã, ijapu haguére ore rehe.
12 Pa'i kuéra ndojepy'apýi ete mba'eve rehe. Ha'e kuéra niko ombokua ñemi mesa guýpe, ha upe rupi oike jepi ho'upa pe tembi'u.
13 Osẽ vove pa'i kuéra, mburuvicha guasu omoĩ pe tembi'u Bel renondépe.
14 Daniel katu he'i hembiguái kuérape ogueru haguã tanimbu ha omosarambi pe tupao ryepy rehe. Kóva ojejapo mburuvicha guasu renondépe. Osẽmba rire, omboty hikuái pe okẽ ha oheja hese mburuvicha kuãirũmbore ani haguã avave oho oipe'a. Upéi ohopa hikuái.
15 Jepi guáicha, pa'i kuéra, hembireko ha imitã nguéra reheve oho pe pyhare, ha ho'upa pe tembi'u ha kaguy.
16 Ko'ẽmbávo, mburuvicha guasu oho Daniel ndive pe tupaópe.
17 Oguahẽvo upépe mburuvicha guasu oporandu chupe:—Daniel, ndojepe'áipa ra'e umi okẽ?—Nahániri che ruvicha, —he'i chupe Daniel.
18 Oipe'ávo pe okẽ, mburuvicha guasu oma'ẽ upe mesáre ha osapukái:—Nde tuichaite piko, ndé Bel! Nde niko añetehápe, Tupã hína.
19 Daniel oñemoĩ opuka, ha ojoko mburuvicha guasúpe oike mboyve tupaópe. Ha he'i chupe:—Ema'ẽmi yvýre, che ruvicha guasu. Máva pyporépa umíva?
20 Mburuvicha guasu he'i:—Ahechaháicha, kuimba'e, kuña ha mitã pypore umíva.
21 Ipochy eterei ha omonambika pa'i kuéra, hembireko ha imitã nguéra reheve.Upémarõ, ha'e kuéra ohechauka chupe pe okẽ, oikeha rupi hikuái ñemiháme ho'u haguã pe tembi'u mesa ári oĩva.
22 Upéi mburuvicha guasu ojukauka umi pa'i, ha oheja pe ta'ãnga Daniel pópe. Ha'e ohundi pe ta'ãnga itupao reheve.
23 Oĩ vaekue avei Babilóniape peteĩ mbói jagua tuicháva, ha umi upepegua omomba'e guasúva.
24 Peteĩ jey, mburuvicha guasu he'i Daniélpe:—Eréta piko chéve kóva avei vrónsegui ojapoha? Nderehechái piko mba'éichapa okaru? Ndaikatúi ere chéve kóva ndaha'eiha peteĩ tupã oikovéva. Aipota remomba'e guasu chupe.
25 Daniel katu he'i chupe:—Che amomba'e guasu Tupã che Járape. Ha'e hína pe Tupã oikovéva. Nde rehejárõ, che ruvicha guasu, che ajukáta ko mbói jagua, aiporu'ỹre kyse puku térã mba'eveichagua yvyra.
26 Ha mburuvicha guasu oheja chupe.
27 Daniel ombojehe'a ojuehe vléke, ñandy ha kavaju rague. Ombojy umíva oñondive ha ombyapu'a-pu'a, ha omombo pe mbói jagua jurúpe. Pe mbói omokõ umíva, ha upéi ovu ha okapu. Daniel he'i chupe kuéra:—Ma'ẽmi mba'épa peẽ pemomba'e guasu!
28 Umi Babiloniagua oikuaa vove ko'ã mba'e, ipochy. Opu'ã mburuvicha guasúre ha oñepyrũ he'i:—Ñande ruvicha guasúgui oiko judío ko'ágã! Ñepyrũrã, ohundi Bel ra'ãnga ha ojukauka pa'i kuérape, upéi katu ojuka pe mbói jagua.
29 Oho hikuái mburuvicha guasu rendápe, ha he'i chupe:—Eme'ẽ oréve Daniel, ỹrõ rojukáta ndéve, nde rogagua ndive.
30 Ha mburuvicha guasu ojejopy vaígui, ome'ẽ mante chupe kuéra Daniel.
31 Ogueraha oity hikuái Daniélpe león kuéra apytépe, ha upépe oheja chupe 6 ára pukukue.
32 Pe korápe oĩ 7 león. Ha umíva oñemongarúva ára ko'ẽre, mokõi te'õngue ha mokõi ovecha rehe. Upe ára upévape katu, noñemongarúi ikatu haguã ho'u Daniélpe.
33 Umíva umi árape oĩ Judá rupi maranduhára*f** Habacuc. Ombojypa ramo tembi'u ha omoĩ hína mbujape ijajakápe oho haguã kokuépe ogueraha hembi'urã kóga mono'õhárape.
34 Upe jave oguahẽ hendápe Ñandejára remimbou,*f** ha he'i chupe:—Eraha pe tembi'u rerekóva Daniélpe, oĩva Babilóniape león kuéra apytépe.
35 Habacuc he'i chupe:—Che Jára, che niko ndaháiva Babilóniape, ha ndaikuaái moõpa oĩne umi león.
36 Upe ramo Ñandejára remimbou ipojái iñakã rague rehe ha peteĩ hýupe ogueraha chupe Babilóniape. Oho oheja chupe pe león kuéra oĩha ykére.
37 Habacuc osapukái Daniélpe:—Daniel! Daniel! Kóina ápe tembi'u oguerukáva ndéve Tupã!
38 Daniel he'i chupe:—Ne mandu'a piko che rehe Tupã! Nde niko araka'eve na nde resaráiva umi nde rayhúvagui!
39 Daniel oguapy okaru, ha upe aja Ñandejára remimbou ogueraha jey Habacúcpe upe ojegueru haguégui.
40 Mburuvicha guasu oho oguerojahe'óvo Daniélpe, 7 ára ojeheja haguépe león apytépe. Oguahẽvo umi león oĩháme katu, ohecha Daniélpe oguapýva hína upépe.
41 Upépe osapukái ha he'i:—Nde pokatu ete piko nde, Tupã, Daniel Jára! Ndaipóri ambue Tupã, ndaha'éiva nde!
42 Upéi mburuvicha guasu oguenohẽka Daniélpe, ha oityka león kuéra apytépe umi ojukase mo'ã vaekue Daniélpe. Ha peteĩ tesa pirĩme umi león ho'u chupe kuéra, mburuvicha guasu renondépe.