1 Che Pablo, añeñapytîva Cristo Jesu rejejápe, ja Timoteo ñande reŷi romo maitéiucá ndeve, Filemon, ore raŷjúpára ja ore îrûngue,
2 ja pe cuña carai ore reŷiva Apfiape, ja Arquipo, ore îrûngue, ja umi Iglesia rejegua nde rogape oicóvape.
3 Tûpâ Ñande Rú ja Ñandeyára Jesu Cristo ta penembo pyapôrâ ja tapenembo pyaguapŷ.
4 Arojorŷ tapia Tûpâ Ñandeyára ayerurevo Ñandeyárape che ñemboejápe imanduá jaguâ ndereje,
5 ajendujá reje jei ramo nde reico pôrâjá rejaŷjú ja reyeroviajápe Ñandeyára Jesús, ja opa umi imarangatúva ndive.
6 Ayerure voi aina che ñemboepe co mbae pôrâ jaecuera ojupity vaecue pende yerovia rupi oñatôi jaguâ ipype cuera ojechacuaáucápávo ichupecuera ñande pyapôrâjá, ja ñande yayae pôrâ Cristo reje.
7 Che pya rory voi ja che pya guapy eterei nde che raŷjú rupi ja oñembopya guapŷjá reje umi imarangatúva nde rupi, che ryby.
8 Upeareje iya ramo yepe cheve Cristo rupi añeê pojŷi jaguâ ndeve royocuaivo ndeve reyapo jaguâ pe ipôrâ vaerâ,
9 upea rangue rojaŷjújá reje che cheyejegui voínte Pablo, che tuyavama, ja coanga añeñapytîva avei Cristo Jesu rejejápe,
10 ayerure ndeve pe che raŷ Onesimo reje pe amoñemoña vaecue añeñapytijá rupi.
11 Yma jae na ipôrâi vaecue mârâve ndeve, coanga ipôrâ ndeve guârâ ja cheve avei,
12 ja coanga amondo yeby pype ichupe ne rendape amondo vaicha che anga voi.
13 Che mo arecose rae ichupe che ndive ne rendaguepe oñangareco jaguâ chereje co añeñapytîjápe co Evangelio rejejápe.
14 Upeicharamo yepe, nde reicuaa-y-me nda yaposei mbaeve, icatu jaguâ co nerembiapo pôrâ vaerâ na tecôtevêi gui, nde reipotajárente voí ndeyejegui.
15 Icatu co vaerâ voí rae jae oyepea ndejegui sapyami, nde rereco yeby jaguâ ichupe tapia guârâ,
16 anive jaguâ rereco ichupe tembiguaicha, te rereco ichupe tuvichavé tembiguai gui, peteî ñanderejeguaicha catu yepe, che ajaŷjuetéva catuetei ja nde rejaŷjúetévéva yepe ichupe cuimbaeicha nde rejeguajá reje ja Ñandeyára rejeguaja reje avei.
17 Upeicharamo che rerecoma guive che recua ramo ndeve erojory ichupe cheve che rerojory jaguâicha.
18 Oime ramo jae ombae abyky jague, terâ oime ramo ombojecovia vaerâ ndeve mbaerepy, emointe che rerape cuatiápe.
19 Che Pablo amoî co cuatiápe che póete rupi, che ambojecoviáne ndeve nembaerepŷ. (Icatu ndaei che ndeve nde voí rembojecoviá vaerâjá nde yupe cheve.)
20 Upeicha voi vaerâ, che ryby, ta che rory nendive Ñandeyára rejejápe. Chembo pyaguapŷna Cristo rejejápe.
21 Che jaeuca ndeve coicha co cuatia ñeême ayeroviajá reje ndereje nde rembuaye vaerâjá che ñeê ja aicuaa voi reyapové jaguâ yepe che jaeva gui.
22 Upeicha avei embosacoíucá che rerojorŷucá jaguâ cheve mbojupáicha. Ajaârô voí pene ñemboe rupi iya jaguâ cheve abyá jaguâ aíme penendive.
23 Nemo maitéiucá ndeve pe Epafras che îrû co ore roñeñapytîjápe Cristo Jesus rejejápe.
24 Upeicha avei Marcos, ja Aristarco ja Demas ja Lucas, che pytyvôjaré jaecuera co tembiapope.
25 Ñandeyára Jesu Cristo pya pôrângue toico pene anga ndive. Amen.