1 Añetejápe pe iñypyrumby guarepe yepe iya jeco ombuetejá Tûpâ Ñandeyárape, ja oime vaecue ipype jenda imarangatúva co yby ári guare voi.
2 Oime peteî tûpâo ao guigua oñembosacoí vaecue, pe coty itenondéva oi jague pe tataendy renda ja tûpâmbae renda avei ja umi mbuyape icarai vaecue, co tenda oyee vaecue Tenda imarangatúva.
3 Ja pe ao mocoîjá rapycuevo oi pe coty aoguigua oyee vaecue pe Tenda imarangatúetéetêvéva,
4 ja ipype oi pe mbae ryâcuâ ryru oroguigua, ja pe caramegua pe ñeê pe teco ñypyrumby guare ryru, oyeguapáva orope: ipype oi pe mbayru oroguigua pe manna ryru: ipype avei oi pe Aaron ybyrai ipopegua ipoty vaecue ja upeicha avei oi ipype umi itá ipépyre oi jague umi ñeê pe teco ñypyrumbŷ guare rejegua.
5 Ja upe caramegua ári oime umi yvapegua cuera raângá ojesapéjápe omoâva pe tenda Ñandeyára oñemoñyrôucá jápe.
6 Coanga ndicatuveima añeê pucu coambae gui. Oimba vove coicha âmbae, umi pai oyapo jaguâ jecope pe tecôtevê vaerâ oñemboe jaguâ,
7 oikéva opa árape pe tûpâo aoguigua coty tenondévape: pe mocoî cotŷjápe pe pai guasúetéva oiké jaeño peteî yeby peteî roŷpe, ja máramo ndoikei tuguy ŷ reje oicuameê vaerâ oyeje vointe, ja umi ambuecue reje avei, oyeyaby jague reje oicuaa ŷ reje.
8 Coâva rupi pe Espiritu Santo oicuaáucá pe tape ñaguajê jaguâ pe Tenda imarangatúetévéva jaetévape, neira jague oyecuaáucá, opyta aya gueteri pe tûpâo aoguigua coty tenondéva.
9 Upéva peteî jaângánte iyáva ñande ára peguârâ, oñecuameêjá tûpâmbae ja mbae iyucapyrâ icatu ŷ va ombojeco marangatupá pe oñemboévape jina,
10 umi oñecuameêva tembiu guivo guarente, ja mbae yaŷújá guivo guare, ja opaichagua yeyojéi guivo guare, ñande rete oyepocuaajá guivo voi, oico oñemyatyrômba meve opambae jecorâme.
11 Upegui Cristo oñemoingo pai guasúeté ramo omeê jaguâ umi mbae ipôrâva ou vaerâ pe tuvichaveva oñemboe jaguâ renda jaetévéva pe oga aoguigua gui nda iyapópyréi po rupi, ja nda co yby ñemoñare rejeguávái.
12 Ja co Cristo oiké peteî yebynte ipajá pe imarangatújá rendape nda cabará terâ vaca raŷ ruguycue rupiri, juguŷeté rupinte ojupity pype rae upeicha rupi ñande repyrâ tapia guârâ.
13 Pe cabará, ja toro ruguycue, ja pe vaca ray cáigue tanimbu oyejypyi vaecue umi oñemonguŷa vaecue ári, umimbae omomarangatu ramo ichupecuera omopôtí jeco pôrâ jaguâ,
14 upeicharamo ¿na ipôrâ vei chepane Cristo ruguy pe oñecuameê vaecue oyupe voi imârâ ŷ reje Tûpâ Ñandeyárape pe Espiritu iyapyra-ŷ-va rupi, naipôrâvei chepane omopôtí jaguâ pende pyapy tembiapo reongue gui, icatu jaguâ peñemboe jecópe Tûpâ Ñandeyára oicovevape.
15 Ja coâva rupi Jae pe oipaûndyjára co teco pyajúvape, icatu jaguâ oime pype rae peteî omano vaecue jepyrâ umi opia vaecuepe oico yaveve pe teco ñepyrumbype guare, umi oñejenoîmbyre ojupity jaguâ mbae yárarâ tapiaguârâ pe oñecuameê mbyre ichupecuera.
16 Oimejape peteî cuatia ñeê mbae yárarâmeguarâ tecôtevê rae oyecuaáucá omano jague añete pe cuatia ñeê apojaré:
17 pe cuatia ñeê mbae yárarâme guârâ iya omano rire mante pe mbaeyára cue, naipôrâi marave voí oicové aya pe iyapójaré.
18 Upeicharamo yajecha pe ñeê pe teco ñepyrumbŷpe guare rejegua yepe noñemongaraíri jague tuguy ŷ reje.
19 Ja Moises oicuaáucá jaguepe opavave ojendu jaguâ opa Tûpâ Ñandeyára rembiapoucapŷ pe ñeê Moisespe oñemeê vaecue pegua, oipyjy pe vaca ray ja cabará ruguycue ja oipyjy avei ŷ ja ovecha rague pytâva ja caavó, ja ojypyi pe itá ñeê reje ja opa umi jeŷicuerareje,
20 jeivo: Cova co tuguy ombojaetéva co teco oñocuameêjá oñoñeême omoingo vaecue Tûpâ Ñandeyára penendive.
21 Upeicha avei jae ojypyi tuguy pe tûpâo aoguigua reje, ja opa umi mbayru tembiporu pe tûpâopeguava reje.
22 Añete jaime icatu yae oyeyapóucá jaicha pe Moises ñeê rupi opambae oñemopôtíjá tuguype, ja oñeñojê ŷ rire tuguy ndicatui oime oñemboí jaguâ angaipa.
23 Upeicharamo tecôtevê ramo umi yvapegua raângá oñemopôtí jaguâ coicha oñemongarai pype, tecôtevêvé umi yvapétégua voi oñemopôtí jaguâ iyucapyrâ angaipa repŷrâ ipôrâitéetévéva ja jaeteveva umiva gui.
24 Ndajaei pe tûpâo imarangatújápe oñemopuâmbyre ybypóra po rupi, pe jaetéva yoguajánte vaecue, oike vaecue Cristo, Jae oike vaecue yvaetépe vointe, oyejecha jaguâ coaguirire Tûpâ Ñandeyára ypype ñande rejejápe.
25 Ja Jae ndoikei yeby yeby oñecuameê jaguâ oyupe voi, pe pai guasu oike jaicha pe tûpâo imarangatúetéjá rendape opa roŷ ruguy ambue rejeve jesegua ŷ va.
26 Upeicharamo, Cristo ojasa asy yeby yeby vaerâ moa co yby oyeyapo ypy jague guivo coangapeve, ja yaicuaa voi coanga Jae oyejecha jague peteî yebynte ipajaite ôguajêjápe jiara oipea jaguâ angaipa oyeyucá pype Jae voi angaipa repyrâ.
27 Ja iya jaicha opa ybypórape omano peteî yebynte, ja uperire oico pe oñembojecovia jaguâ ára,
28 upeicha avei Cristo oñecuameê vaecue oyupe peteî yebynte ogueropuaca jaguâ angaipa repy umi ambue jeta rendaguepe, ja oyejecha yebyne mocoîjápe angaipa ŷ rejema umi omañavape Jese ojaârôjápe jecoitepe oñemomarangatúeté jaguâ.