1 Upeicharamo ñañembo jeco marangatu jague reje yayerovia jague rupi, oime oñyrôma Tûpâ Ñandeyára ñandeve Ñandeyára Jesu Cristo rupi.
2 Jaerupi avei iya rae ñandeve yaike jaguâ yayerovia rupi co teco ory Ñandeyára pyapôrâ guiguape co ñaimejápe voí ja ñañe mombeu guasu ñajaârô járeje yajecha jaguâ Tûpâ Ñandeyára oñembotuvichajápe.
3 Ja uperire oime upeicha avei ñañe mombeu guasu jaguâ yajasa vaípe yepe yaicuaajá reje co yajasa vaí oñatoijá ñandeve ñane pya rôsârâme yaropuacajápe,
4 ja co ñane pya rôsângue oñatôi ñande pocuaáucá jaguâ ja pe yayepocuaa jague oñatôi ñajaârôcuaa jaguâ,
5 ja co ñajaârôcuaájá na ñanemotîvái oñoña járeje pe Tûpâ Ñandeyára mborayju ñane ángame pe Espiritu Santo pe Jae omeê vaecue ñandeve rupi.
6 Cristo voínte pe ñande puacaŷme gueteri yepe, jiárape omano umi jecoñaña rejejápe.
7 Añetejápe jasype oimene omano vaerâ peteî cuimbae jecoitépeguava rejejápe, opaichavévonte icatu oiméne oicuameêséva omano jaguâ peteî cuimbae imbae pôrâva rejejâpe.
8 Tûpâ Ñandeyára voi ojechacuaaucá ñanderaŷjújá angaipavóra ramo yepe ñande, omano pype Cristo ñande rejejápe.
9 Upeicharamo ñañembo jecomarangatuma ramo juguŷ reje icatuve vaerâ ñañerenojê jaguâ Jaerupi Tûpâ Ñandeyára ñemyrô gui.
10 Upeicha ñañemyrô rire yepe, Tûpâ Ñandeyára oñyrô ñandéve Itayra omano jague rupi, icatúetévé vaerâ ñañyrô rire yajupity jaguâ ñane mârâŷ jaguâ Jae oicovejá reje.
11 Ja uperire oime upeicha avei ñañe mombeu guasu jaguâ Tûpâ Ñandeyára ndive, Ñandeyára Jesú Cristo rupi pe yajupityma jague Tûpâ Ñandeyára oñyrô jaguâ ñandeve.
12 Upeicharamo, peteî rupi oico ypy jagueicha co yby ári pe angaipa, ja pe ñemanojá oico ypy jagueicha angaipa rupi, upeicha avei pe ñemanojá ôguajê opavave ybypóra cuerape, opavave iñangaipa jague reje.
13 Pe Moises ñeêngue oico mboyve voí, pe angaipa oicoma voi co yby ári. Pe angaipa ndo yejechacuaai mante oime ŷ jápe ñeê jecopegua.
14 Opaichavévo oñembo puacá pe ñemanojá Adan guive Moises peve, umi iñangaipa ŷ vaecue yepe pe Adan oyeyaby jagueichagua reje. Upéva voí pe ou vaerâ vaecue yoguajá.
15 Ja na ñane rembiapo vaí vaichai catu pe Tûpâ Ñandeyára remimeêmbyre. Umi ybypóra jeta omano ramo yepe peteî rembiapo vaícue rupi, upeicha ramo yepe ipya pôrâ catuetei Tûpâ Ñandeyára jetáva ndive, ja oyoa yoavé umi ybypórape jemimeêmbyre ipya pôrâ guigua peteî caraí Jesú Cristo rupi oñemeê vaecue umi ybypora cuera peguârâ.
16 Ja pe angaipa oico ramo yepe peteî rupi, nda upeichai pe Tûpâ Ñandeyára remimeêmbyre. Pe Tûpâ Ñandeyára ñemyrô añete oico ñandeve peteî angaipa rupi ñañemoî vaíucá jaguâ. Upeicharamo yepe pe Tûpâ Ñandeyára remimeêmbyre oico ñandeve ñane angaipa jeta rejeve yepe ñañe mopôtiucá jaguâ opambaegui.
17 Upeicha peteî cuimbae rembiapocue vaí gui oico rire pe ñemano pe peteî cuimbae rupi, icatuvé vaerâ umi ojupitŷva Tûpâ Ñandeyára pya pôrâ jembŷ jaguâ ja pe jemimeêmbyre oñembo jeco marangatu jaguâ oñembo tuvicha jaguâ pe jecové iyapyraŷvape pe peteî carai Jesu Cristo rupi.
18 Upeicha rupi peteî tembiapo vaí reje iya jagueicha opavave ybypórape opyta vaí jaguâ jicuai, upeicha avei peteî tembiapo jecopegua reje iya opavave ybypóra cuerape oñembo jeco marangatu jaguâ oicove tapia jaguâ.
19 Ja peteî ybypóra iñeêrenduse ŷ jague reje opavave ybypóra oñemoingo jagueicha angaipavóra ramo, upeicha avei pe peteî iñeêrendusé járeje jecópe iya opavave ybypórape oñemoingo jaguâ jeco marangatúva ramo.
20 Uperire Moises ñeêngue oñemoingo pe angaipa ocacuaa jaguâ, ja ocacuaajápe pe angaipa oyoáve pe Tûpâ Ñandeyára pya pôrâ,
21 icatu jaguâ pe angaipa ipuaca jaicha omomano jaguâ, upeicha avei pe Tûpâ Ñandeyára pya pôrâ ipuaca tuvicha ombo jecomarangatu jaguâ yaicove jaguâ tapiaguârâ Jesu Cristo Ñandeyára rupi.