1 O lenei, matou te ‘ai‘oi atu ‘iā te ‘outou, le ‘au uso e, e uiga i le afio mai o lo tatou Ali‘i o Iesu Keriso, ma lo tatou fa‘apotopotoina ‘iā te ia;
2 ‘ina ne‘i vave lūlūina o ‘outou loto, pe fa‘aatuatuvaleina i se agaga, po o se ‘upu, po o se tusi, peiseaī nai ‘iā i matou, peiseaī ‘ua o‘o mai le aso o le Ali‘i.
3 ‘Aua ne‘i fa‘asesē se tasi ‘iā te ‘outou i se togafiti e tasi; auā e lē o‘o mai lenā aso, se‘ia mua‘i ‘ona taunu‘u o le tēte‘a ‘ese, ma ‘ia fa‘aalia mai o le tagata o le amio leaga, o le tagata lea o le malaia,
4 o lē tete‘e atu, ma fa‘amaualugaina o ia e ia, e sili i mea uma lava ‘ua ta‘uatuaina, ma mea uma ‘ua ifo i ai tagata, o lea ‘ua ti‘eti‘e ai o ia i le malumalu o le Atua, o lo‘o fa‘aali mai o ia, o le Atua lava o ia.
5 Tou te lē manatu ‘ea, na ‘ou fai atu ia mea ‘iā te ‘outou, a o tatou i ai ma ‘outou?
6 O lenei fo‘i, ‘ua ‘outou iloa le mea o lo‘o fa‘alavelave nei lava, ‘ina ‘ia fa‘aalia mai o ia i ona lava aso.
7 Auā o lo‘o galue nei lava le mea lilo a le amio leaga, ‘ae lilo ai na ona se‘ia ‘ave‘eseina lē o fa‘alavelave.
8 ‘Ona fa‘aalia mai ai lea o lē ‘ua amio leaga, e fano o ia i le Ali‘i, o Iesu i le mānava mai o lona fofoga, ma fa‘aumatia i le fa‘aali mai o lana afio;
9 O lona sau fo‘i e pei o le galuega a Satani lea, i le mana uma, ma fa‘ailoga, ma vāvega pepelo,
10 ma mea fa‘asesē uma o le amio leaga i ē a fano; auā ‘ua latou lē talia le ‘upu moni ma le fiafia i ai, ‘ina ‘ia fa‘aolaina ai i latou.
11 O le mea, fo‘i lea e ‘auina atu ai e le Atua ‘iā te i latou le galuega e fa‘asesē ai, ‘ina ‘ia latou talia le mea pepelo,
12 ‘ina ‘ia fa‘asalaina o i latou uma lava o ē lē talia le ‘upu moni, ‘ae fiafia i le amioleaga.
13 A o i matou e tatau ‘ona matou fa‘afetai i le Atua e lē aunoa ‘ona o ‘outou, le ‘au uso e, ē ‘ua alofagia e le Ali‘i, auā na filifili le Atua ‘iā te ‘outou nai le amataga ‘ia fa‘aolaina i le fa‘apa‘iaina e le Agaga, ma le fa‘atuatua i le ‘upu moni.
14 O lenā le mea na vala‘auina ai ‘outou e ia i la matou tala lelei, ‘ina ‘ia maua le manuia o lo tatou Ali‘i o Iesu Keriso.
15 O lenei le ‘au uso e, ‘ia ‘outou tumau ai, ‘ina ‘ia tāofi mau le ‘uputu‘u na a‘oa‘oina ai ‘outou i la matou ‘upu po o la matou tusi.
16 O lo tatou Ali‘i lava o Iesu Keriso, ‘atoa ma le Atua lo tatou Tamā, o lē ‘ua alofa mai ‘iā te i tatou, ma na foa‘i mai le fa‘amatala loto e fa‘avavau, ma le fa‘amoemoe lelei i le alofa tunoa.
17 ‘Ia fa‘amafanafana atu e ia i o ‘outou loto, ma ‘ia fa‘atumauina ‘outou i ‘upu lelei uma ma galuega lelei uma.