1 ‘Ua ao, ‘ona taupulepule loa lea o le ‘au ositaulaga sili ‘atoa ma toeaina ma le ‘au tusi‘upu, ma le taupulega uma, ‘ua latou noanoa ‘iā Iesu, ma ta‘ita‘i atu ‘iā te ia, ma tu‘uina atu ‘iā Pilato.
2 ‘Ona fesili mai lea o Pilato ‘iā te ia, “O oe ‘ea o le tupu o tagata Iutaia?”‘Ona tali atu lea o Iesu ‘iā te ia, “O lea lava.”
3 ‘Ua momoli fo‘i ‘iā te ia e le ‘au ositaulaga sili i mea e tele.
4 ‘Ona toe fesili mai lea o Pilato ‘iā te ia, “‘E te lē tali mai ‘ea? Fa‘auta i le tele o mea ‘ua latou molimau ai ‘iā te oe.”
5 A ‘ua lē tali atu Iesu sina ‘upu; o le mea lea ‘ua ofo ai Pilato.
6 O lea tausamiga ma lea tausamiga, e tatalaina atu e Pilato ‘iā te i latou se tasi pagotā, latou te fai ane ai.
7 Sa i ai le tasi ‘ua igoa ‘iā Parapa, ‘ua noatia fa‘atasi ma ē na fouvale ma ia, ē na fasioti tagata i le fouvale sa fai.
8 ‘Ona ‘alalaga atu ai lea o le motu o tagata, ma fai atu, ‘ina ‘ia faia e ia ‘iā te i latou fa‘apei ‘ona masani ai o ia.
9 ‘Ona tali atu lea o Pilato ‘iā te i latou, “Tou te loto ‘ea ‘ina ‘ia ‘ou tatalaina atu ‘iā te ‘outou le tupu o tagata Iutaia?”
10 Auā ‘ua na iloa o le matau‘a na tu‘uina atu ai o ia e le ‘au ositaulaga sili.
11 A o le ‘au ositaulaga sili, ‘ua latou fa‘aoso i le motu o tagata, ‘ina ‘ia tatalaina mai e ia o Parapa ‘iā te i latou, ‘ae tu‘u pea Iesu.
12 ‘Ona toe tali atu ai lea o Pilato ‘iā te i latou, “Se a fo‘i se mea tou te loto i ai ‘ou te faia ‘iā te ia e ta‘ua e ‘outou o le tupu o tagata Iutaia?”
13 ‘Ona latou toe ‘alalaga ai lea, “‘Inā fa‘asatauro ia ‘iā te ia.”
14 ‘Ona fai atu lea o Pilato ‘iā te i latou, “Se a fo‘i se mea leaga ‘ua na faia?”A ‘ua atili ai ‘ona latou ‘alalaga, “‘Inā fa‘asatauro ia ‘iā te ia.”
15 ‘Ua loto Pilato e fa‘alotomalie i le motu o tagata, ‘ua ia tatalaina atu ai Parapa ‘iā te i latou; ‘ua uma ‘ona sasaina o Iesu e ia, ‘ona ia tu‘uina atu lea o ia ‘ia fa‘asatauroina.
16 ‘Ona ta‘ita‘iina atu lea o ia e le ‘au i le maota, o le maota lea o le ali‘i, ‘ua latou fa‘apotopotoina fo‘i le ‘au uma.
17 ‘Ona latou fa‘a‘ofu lea ‘iā te ia i le ‘ofu pāuli, ma latou ta‘ata‘ai la‘au tuitui ‘ua fai ai le pale, ‘ua fa‘apaleina ai o ia.
18 ‘Ona latou alolofa mai lea ‘iā te ia, “Talofa le tupu o tagata Iutaia!”
19 ‘Ua latou tā fo‘i i lona ao i le u, ma feanu ‘iā te ia, ma to‘otuli ma ifo ‘iā te ia.
20 ‘Ua uma, ‘ona latou fa‘atauemu ‘iā te ia, ‘ona latou tō‘eseina lea o le ‘ofu pāuli ‘iā te ia, ma fa‘a‘ofu ‘iā te ia i ona lava ‘ofu; ‘ona latou ta‘ita‘i atu lea ‘iā te ia ‘ia fa‘asatauroina o ia.
21 ‘Ua alu ane le tasi tagata, o Simona le Kurene, na sau mai le vao, o le tamā fo‘i o ia o Alesana ma Rufo, ‘ona latou fa‘atauānau lea ‘iā te ia, ‘ina ‘ia ‘ave e ia o lona satauro.
22 ‘Ua latou ‘ave fo‘i ‘iā te ia i Kolokota, o lona uiga pe a fa‘amatalaina, o le mea o i ai le ulupo‘o;
23 ‘ona latou avane lea ‘iā te ia le uaina ‘ua fefiloi ma le muro, e inu ai; a ‘ua lē talia e ia.
24 ‘Ua latou fa‘asatauroina o ia, ‘ona latou tufatufa lea i ona ‘ofu, ma fai ai le vili, e iloa ai le mea a le tagata.
25 O le aoauli na latou fa‘asatauro ai ‘iā te ia.
26 ‘Ua tusia fo‘i le tusi i le mea na molia ai o ia, “O LE TUPU O TAGATA IUTAIA.”
27 ‘Ua latou fa‘asatauro fo‘i fa‘atasi ma ia tagata fao mea e to‘alua; o le tasi i lona itū taumatau ma le tasi i lona itū tauagavale.
28 Na taunu‘u ai le Tusi, ‘ua fa‘apea: Na faitauina o ia fa‘atasi ma pagotatā.
29 O i latou fo‘i na ui ane ‘ua latou fāifai ‘iā te ia, ma lialia‘i o latou ulu, ‘ua fa‘apea mai, “Ue! O oe na o lē lepeti le malumalu, ma toe faia i aso e tolu,
30 ‘inā fa‘aola ia oe ‘iā te oe ma alu ifo i le satauro.”
31 ‘Ua fa‘apea fo‘i le ‘au ositaulaga sili ‘ua fa‘atauemu i latou fa‘atasi, ‘atoa ma le ‘au tusi‘upu, ‘ua fa‘apea ane, “Na ia fa‘aolaina isi tagata, na te lē mafaia ‘ona fa‘aola o ia ‘iā te ia.
32 ‘Inā alu ifo nei lava le Keriso, le tupu o Isaraelu, i le satauro, tatou te iloa ai ma tatou fa‘atuatua ai.”O ē na fa‘asatauroina fo‘i fa‘atasi ma ia, ‘ua la ‘upu leaga ‘iā te ia.
33 ‘Ua o‘o i le tutonu o le lā ‘ona pogisā uma ai lea o le nu‘u, ‘ua o‘o lava i le itūlā e tolu.
34 O le itūlā e tolu fo‘i ‘ua ‘alaga ai Iesu, ‘ua leo tele, ‘ua fa‘apea atu, “Eloi, Eloi, lama sapatani?” O lona uiga pe a fa‘amatalaina, “Lo‘u Atua e, lo‘u Atua e, se a le mea ‘ua e tu‘ulafoa‘i mai ai a‘u?”
35 ‘Ua fa‘alogo ai nisi o ē na tutū mai, ‘ona latou fa‘apea ane ai lea, “Fa‘auta, o lo‘o vala‘au atu o ia ‘iā Elia.”
36 ‘Ona momo‘e lea o le tasi, ma fufui le omomi i le vineka, ‘ua tu‘u i luga i le pito la‘au, ma fa‘ainu ‘iā te ia, ‘ua fa‘apea atu, “Tu‘u pea ia; se‘i tatou iloa pe sau Elia e ‘ave ifo ‘iā te ia.”
37 ‘Ua ‘alaga Iesu ‘ua leo tele, ‘ona tō ai lea o lana mānava.
38 ‘Ona saeluaina lea o le ‘ie puipui o le malumalu, ‘ua amata mai i luga, ‘ua o‘o lava i lalo.
39 O le ta‘ita‘i o le to‘aselau, o lē na tu atu i ona luma, ‘ua iloa e ia ‘ua fa‘apea ‘ona tō o lana mānava ‘ona fa‘apea atu ai lea o ia, “E moni, o le Alo o le Atua lenei tagata.”
40 Sa i ai fo‘i fafine o matamata mamao mai, sa i ai fo‘i ‘iā te i latou o Maria le Makatala, ma Maria le tinā o Iakopo le itiiti ma Iose, ‘atoa ma Salome.
41 O ē na mulimuli atu ‘iā te ia ‘ina o i Kalilaia o ia, ma ‘au‘auna ‘iā te ia; ‘atoa ma isi fafine e to‘atele, o ē na ō a‘e fa‘atasi ma ia i Ierusalema.
42 ‘Ua o‘o i le afiafi, auā o le aso e sauni ai, o le aso lea i tua atu o le sapati.
43 ‘Ua alu ane ai Iosefa le Arimataia, o le tasi faipule sili, o ia fo‘i sa fa‘atalitali i le mālō o le Atua, ‘ua loto tele o ia ma alu atu ‘iā Pilato, ma fa‘anoi atu ai i le tino o Iesu.
44 ‘Ona ofo lea o Pilato ‘ina ‘ua vave maliu o ia; ‘ua na vala‘au atu fo‘i i le ta‘ita‘i o le to‘aselau, ma fesili atu i ai, po o ‘ua leva lona maliu.
45 ‘Ua iloa o ia i le ta‘ita‘i o le to‘aselau, ‘ona avatu ai lea o le tino ‘iā Iosefa.
46 Na fa‘atau mai e Iosefa le ‘ie lino, ‘ua ‘ave ifo fo‘i ‘iā te ia, ‘ona aui lea i le ‘ie lino, ‘ua tu‘u fo‘i ‘iā te ia i le tu‘ugamau na foa i le papa, ‘ona fuli ane lea o le ma‘a i le gutu o le tu‘ugamau.
47 ‘Ua va‘ava‘ai fo‘i Maria le Makatala, ma Maria le tinā o Iose i le mea na tu‘uina ai o ia.