41 ‘Ua tago o ia i areto e lima ma i‘a e lua, ‘ona tepa a‘e lea i le lagi, ‘ua fa‘afetai, ‘ona tofitofi lea i areto, ma avatu i ona so‘o, latou te laulau atu ai ‘iā te i latou; ma i‘a fo‘i e lua ‘ua na tufatufa atu ai ‘iā te i latou uma,
42 ‘Ona ‘a‘ai uma lea o i latou, ‘ua mā‘o‘ona.
43 ‘Ua latou fu‘e fo‘i i ‘ato e sefulu ma le lua, na tūtūmu i toe mea ‘atoa ma fāsi i‘a.
44 O i latou na ‘a‘ai i areto pe limaafe o tane.
45 ‘Ona u‘una‘i loa lea o ia i ona so‘o ‘ina ‘ia latou ō a‘e i le va‘a ma muamua atu i le tasi itū i Petesaita, ‘ina se‘ia tu‘uina atu e ia le motu o tagata ‘ia ō.
46 ‘Ua fa‘amāvae o ia ‘iā te i latou, ‘ona maliu atu lea o ia i le mauga e tatalo.
47 ‘Ua o‘o i le afiafi, ‘ua i totonu o le vasa le va‘a, a ‘ua to‘atasi o ia i uta.