14 ‘Ua fusia le amo a ‘ou solitulafono e lona lava ‘a‘ao;‘ua filia, ‘ua o‘o lava i lo‘u ua; ‘ua ia fa‘avaivaia lo‘u malosi‘ua tu‘uina a‘u e le Ali‘i i lalo i o latou lima ‘ou te lē mafai ai ‘ona tula‘i.
15 ‘Ua fa‘alēaogāina e le Ali‘i o‘u tagata malolosi uma o i totonu ‘iā te a‘u;‘ua ia tala‘i le fa‘apotopotoga e tete‘e ‘iā te a‘u ‘ia tu‘imomomo i o‘u taulele‘a;‘ua se soligāvine, ‘ua solia ai e le Ali‘i le taupou, o le tama fafine a Iuta.
16 ‘Ona o nei mea ‘ua ‘ou tagi ai; o o‘u mata, ‘ua tafe ifo le vai i o‘u mata;auā ‘ua vāvā mamao ma a‘u o sē fa‘amafanafana ‘iā te a‘ue fa‘afoisia mai ai lo‘u ola; ‘ua nonofo la‘u fānau ‘ua na o i latou,auā ‘ua mālō lē ‘ua ita mai.
17 ‘Ua fa‘aloaloa atu e Siona ona lima, ‘ae leai se fa‘amafanafana ‘iā te ia;‘ua poloa‘i le ALI‘I i ē ita ‘iā Iakopo i ona itū uma;‘ua fai Ierusalema ‘iā te i latou e pei o se fafine ‘ua fa‘anofo‘eseina.
18 ‘Ua amiotonu le ALI‘I; auā ‘ua ‘ou fouvale i lana poloa‘iga;‘inā fa‘alogologo mai ia ‘outou tagata uma ma ‘ia ‘outou va‘ava‘ai mai i lo‘u tigā;o o‘u taupou ma o‘u taulele‘a ‘ua ō i latou i le tāfeaga.
19 Na ‘ou vala‘au atu i ē na manana‘o mai ‘iā te a‘u,a ‘ua latou fa‘a‘ole‘ole mai ‘iā te a‘u;o a‘u ositaulaga ma o‘u toeaina ‘ua oti i latou i le ‘a‘ai,a o latou sā‘ili i ni mea e ‘ai mā latou, ‘ina ‘ia fa‘afoisia ai lo latou ola.
20 Le ALI‘I e, ‘inā silasila mai ia; auā ‘ua ‘ou puapuagā;‘ua sapotuvale lo‘u manava; ‘ua matuā tigā lo‘u loto i totonu ‘iā te a‘u;auā ‘ua ‘ou matuā fouvale; o fafo ‘ua āufānaua i le pelu, o i fale ‘ua peiseaī o le oti.