1 O a‘u le tagata ‘ua iloa le puapuagā i le sasa o lona to‘asā.
2 ‘Ua ia ta‘ita‘i ma ‘aumai ‘iā te a‘u i le pouliuli, ‘ae lē o le malamalama.
3 E moni, ‘ua ia toe liliu mai lona ‘a‘ao e a‘oa‘i ‘iā te a‘u i le aso ‘atoa.
4 O ia ‘ua agosi ai o‘u ‘a‘ano mo pa‘ū; ‘ua gauia e ia o‘u ivi.
5 ‘Ua ia ati a‘e ‘olo e tau ma a‘u, ‘ua ia si‘omia a‘u i le mea ‘o‘ona ma le tigā.
6 ‘Ua ia fa‘anofoina a‘u i mea pogisā, e pei o ē ‘ua oti anamua.
7 ‘Ua ia puipuia i itū uma, ‘ou te lē mafai ‘ona alu atu i ai;na fa‘amamafaina e ia ‘ou noanoaga ‘apamemea.
8 A ‘ou ‘alaga atu fo‘i ma uiō, ‘ua ia pupuni mai i la‘u tatalo.
9 ‘Ua ia punitia o‘u ala i ma‘a talai, ‘ua ia fa‘api‘opi‘oina o‘u magāala.
10 O le urosa o ia ‘iā te a‘u, o le leona fo‘i i mea lilo.
11 ‘Ua ia fa‘aliliu ‘ese o‘u ala, ‘ua ia saeia a‘u; ‘ua ia fa‘anofoto‘atasiina o a‘u.
12 ‘Ua lolo‘u e ia lana ‘aufana, ‘ua ia fa‘atūina a‘u e pei o se manulautī e fana i ai.
13 ‘Ua lavea ‘iā te ia ‘ou fatuga‘o i ana ū fanafana.
14 ‘Ua fai a‘u ma tauemuga i lo‘u nu‘u uma, o la latou pese i le aso ‘atoa.
15 ‘Ua ia fagaina a‘u ‘ia mā‘ona i mea ‘o‘ona, ‘ua ia fa‘ainu ‘iā te a‘u ‘ia ‘onā i le laena.
16 ‘Ua ia fa‘amomomo ‘ou nifo i ‘ili‘ili, ‘ua ia ufitia a‘u i le lefulefu.
17 ‘Ua e te‘ena a‘u ‘ia mā tēte‘a ma le filemū; ‘ua galo ‘iā te a‘u le manuia.
18 ‘Ona ‘ou fa‘apea ifo lea, “‘Ua fa‘aumatia lo‘u fa‘atuatuaga ma lo‘u fa‘amoemoega mai le ALI‘I.”
19 ‘Ia e manatu i lo‘u puapuagā ma lo‘u agaleagaina, o le laena ma le rosa.
20 ‘Ia e manatua lava, ‘ua fa‘ano‘uno‘u lo‘u loto i totonu ‘iā te a‘u.
21 O le mea lenei ‘ua toe manatu i ai lo‘u loto, o le mea lea e fa‘amoemoe ai a‘u.
22 O le alofa o le ALI‘I ‘ua lē fa‘aumatia ai i tatou, ‘ona ‘ua lē mavae o lona alofa mutimutivale;
23 e fou mai ia i taeao uma; o tele lou fa‘amaoni.
24 ‘Ua fa‘apea ifo lo‘u i loto, “O lo‘u tofi o le ALI‘I lea.”“O le mea lea ‘ou te fa‘amoemoe ai ‘iā te ia.”
25 O lo‘o agalelei le ALI‘I i ē fa‘atalitali ‘iā te ia, o le tagata e sā‘ili ‘iā te ia.
26 E lelei ‘ona fa‘amoemoe ma le fa‘alologo i le olataga mai le ALI‘I.
27 E lelei i le tagata ‘ina ‘ia tau‘ave e ia le amo ‘ina o taule‘ale‘a.
28 E nofo to‘atasi o ia ma fa‘alologo, ‘ina ‘ua fa‘ae‘etia i luga ‘iā te ia.
29 E tu‘u e ia lona gutu i le efuefu, pe na te maua se fa‘amoemoe.
30 E tu‘u atu e ia o lona alafau i lē tu‘i mai, e fa‘atumuina o ia i le fa‘alumaina.
31 Auā e le tu‘ulafoa‘iina e fa‘avavau e le Ali‘i;
32 auā e ui lava ‘ina fa‘atigā mai o ia,e toe alofa mutimutivale mai o ia e tusa ma le tele o lona alofa.
33 Auā e lē fiafia o ia ona fa‘apuapuagāina pe fa‘atigāina tagata.
34 O le soli i lalo o ona vae o ē noatia uma o le nu‘u,
35 o le fa‘api‘opi‘oga o le fa‘amasinoga o le tagata i luma o le Silisili‘ese,
36 o le fa‘asesēga o le tagata i lana finauga; o mea ia e fia silasila i ai le Ali‘i.
37 Po o ai o ia e fai atu, ‘ona o‘o ai lea,‘ae le‘i fetalai mai ai le Ali‘i?
38 E le tulei ifo ‘ea i le fofoga, o le Silisili‘ese o mea leaga ‘atoa ma le lelei?
39 Pe se a le mea ‘ua muimui ai le tagata ola, o le tagata ‘ona o lana sala.
40 Se‘i tatou su‘esu‘e i o tatou ala ma filifili ma ‘ia tatou toe fo‘i atu i le ALI‘I.
41 Se‘i tatou si‘i atu o tatou loto fa‘atasi ma o tatou lima i le Atua o i le lagi.
42 ‘Ua solitulafono i matou ma ‘ua fouvale i matou; ‘ua e le fa‘amāgalo mai.
43 ‘Ua e ufitia i matou i le to‘asā ma e tuliloa ‘iā i matou; ‘ua e fasiotia, ‘ua lē alofa mai.
44 ‘Ua e ufitia oe i le ao, ‘ina ‘ia lē sao atu ai le tatalo.
45 ‘Ua e faia matou ma otaota ma mea e ‘inosia i luma o nu‘u.
46 O i latou uma o ē ita mai ‘iā te i matou ‘ua fa‘amamaga o latou gutu ‘iā te i matou.
47 ‘Ua ‘iā te i matou le fefe ma le lua o le fa‘atafunaina ma le lepetia o mea.
48 ‘Ua tafe ifo vaitafe i o‘u mata ‘ona ‘ua tu‘imomomo le tama fafine a lo‘u nu‘u.
49 ‘Ua tafe ifo loimata i o‘u mata, ‘ua lē mapu, ‘ua lē aunoa lava,
50 se‘ia silasila ifo le ALI‘I ma ‘ia silafia mai mai le lagi.
51 O o‘u mata e tigā ai lo‘u loto, ‘ona o tama fafine uma a la‘u ‘a‘ai.
52 O ē ita fua mai ‘iā te a‘u, ‘ua latou matuā tuli mai ‘iā te a‘u, e pei se manulele.
53 ‘Ua latou fa‘aumatia lo‘u ola i le lua ‘ua lafo mai le ma‘a i luga ‘iā te a‘u.
54 Na lofia lo‘u ulu i le vai, na ‘ou fa‘apea ifo, “‘Ua ‘ou fano.”
55 Le ALI‘I e, na ‘ou vala‘au atu i lou suafa a‘i le lua e maulalo.
56 Na e fa‘afofogaina lo‘u leo; “‘Aua ne‘i ‘alo ou fofoga i lo‘u mapuitigā ma la‘u ‘alaga.”
57 Na e fa‘alatalata mai ‘iā te a‘u i le aso na ‘ou vala‘au atu ai ‘iā te oe;na e fetalai mai, “‘Aua le fefe.”
58 Le Ali‘i e, ‘ua e faia la‘u finauga; ‘ua e togiolaina a‘u.
59 Le ALI‘I e, ‘ua e silafia le agaleagaina o a‘u; ‘ia e faia lo‘u fa‘amasinoga.
60 ‘Ua e silafia uma lava lo latou fia taui mai ma o latou mafaufauga uma ‘iā te a‘u.
61 Le ALI‘I e, ‘ua e fa‘afofogaina lo latou fa‘aluma mai,ma o latou mafaufauga uma ‘iā te a‘u;
62 o ‘upu a ē laga mai ‘iā te a‘u ma le mea ‘ua latou mafaufau i ai ‘iā te a‘u i le aso ‘atoa.
63 A latou nonofo i lalo pe tutū luga, ‘ia e silasila, ‘ua fai la latou pese ‘iā te a‘u.
64 Le ALI‘I e, ‘ia e taui atu ‘iā te i latou e tusa ma mea ‘ua faia e o latou lima.
65 ‘Ia e tu‘uina atu ‘iā te i latou o le loto fa‘alogogatā, ‘ia e fa‘afano ‘iā te i latou.
66 ‘Ia e tuliloa ‘iā te i latou i lou to‘asā,‘ia e fa‘aumatia i latou a‘i lalo o le lagi o le ALI‘I.