1 O le lua o tausaga o le tupu o Tariu, o lona ono o masina, o le aso muamua o le masina, na ‘aumai ai le afioga a le ALI‘I e le perofeta o Hakai ‘iā Serupapelu le atali‘i o Salatielu, le ali‘i e pule ‘iā Iuta, ‘atoa ma Iosua le atali‘i o Iosataka o le ositaulaga sili, o lo‘o fa‘apea mai.
2 ‘Ua fa‘apea ‘ona fetalai mai o le ALI‘I o ‘au, o lo‘o fa‘apea mai: ‘Ua fai mai lenei nu‘u, E le‘i o‘o i ona aso, o aso e fai ai le fale o le ALI‘I.
3 ‘Ona ‘aumai ai lea o le afioga a le ALI‘I e le perofeta o Hakai, o lo‘o fa‘apea:
4 O ona po nei ‘ea tou te nonofo ai i o ‘outou fale ‘ua tapapa, a o lenei fale ‘ua fa‘atafunaina.
5 O lenei, o lo‘o fa‘apea ‘ona fetalai mai o le ALI‘I o ‘au, ‘Ia ‘outou mafaufau i o ‘outou ala.
6 ‘Ua ‘outou totō mea e tele, ‘ae itiiti mea ‘ua ‘outou ‘aumai ai; ‘ua ‘outou ‘a‘ai, ‘ae le‘i mā‘o‘ona ai ‘outou; ‘ua ‘outou feinu, ‘ae le‘i malilie ai ‘outou; ‘ua ‘outou ‘o‘ofu, ‘ae le‘i mafanafana ai ‘outou; o le ‘ua galue fo‘i i se taui, e fai lana taui e fafao i le taga ‘ua pūpū solo.
7 O lo‘o fa‘apea ‘ona fetalai mai o le ALI‘I o ‘au: ‘Ia ‘outou mafaufau i o ‘outou ala.
8 ‘Inā ō a‘e ia ‘outou i le mauga ma ‘outou ‘aumaia la‘au ma ‘outou faia le fale; ‘ona ‘ou fiafia lea i ai, e vi‘ia ai fo‘i a‘u, ‘ua fetalai mai ai le ALI‘I.
9 ‘Ua ‘outou fa‘amoemoe i mea e tele, fa‘auta fo‘i, ‘ua itiiti; ‘ua ‘outou ‘aumaia i fale, ‘ona a‘u ulafia lea; ai se a? o lo‘o fetalai mai ai le ALI‘I o ‘au. Auā o lo‘u fale o lo‘o ‘ua fa‘atafunaina lea, ‘ae ta‘itasi ‘outou ma momo‘e atu i lona lava fale.
10 O le mea lea ‘ua tāofia ai e le lagi i o ‘outou luga, ‘ina ne‘i totō mai ai le sau; o le lau‘ele‘ele fo‘i ‘ua tāofi e ia ona fua.
11 ‘Ua ‘ou vala‘au fo‘i i le lāmala i luga o le ‘ele‘ele ma luga o mauga ma luga o le saito ma luga o le uaina ma luga o le suāu‘u, ma luga o mea e tutupu i le ‘ele‘ele ma luga o tagata ma luga o manu vaefā, ma luga o galuega uma a o ‘outou lima.
12 ‘Ona fa‘alogo ai lea o Serupapelu le atali‘i o Salatielu ma Iosua le atali‘i o Iosataka le ositaulaga sili, ‘atoa ma ē na totoe uma o le nu‘u, i le si‘ufofoga o le ALI‘I lo latou Atua, ma ‘upu a le perofeta o Hakai, e tusa ma mea na ‘auina mai ai o ia e le ALI‘I lo latou Atua; ‘ua matata‘u fo‘i le nu‘u i le ALI‘I.
13 ‘Ona fai mai lea o Hakai le sāvali a le ALI‘I i le fe‘au a le ALI‘I i le nu‘u, ‘ua fa‘apea mai: O lo‘o fetalai mai le ALI‘I, o a‘u, ‘ou te ‘iā te ‘outou.
14 ‘Ona lagaina ai lea e le ALI‘I o le loto o Serupapelu le atali‘i o Salatielu, o le ali‘i e pule ‘iā Iuta, ma le loto o Iosua le atali‘i o Iosataka le ositaulaga sili, ma loto o ē na totoe uma o le nu‘u, ‘ua latou ō mai ma latou faia le galuega o le fale o le ALI‘I o ‘au o lo latou Atua,
15 i le aso e luafulu ma le fa, i le onoga masina, i le lua o tausaga o Tariu le tupu.