1 O le ata lenei o le tusi na tusia e Ieremia i tagata o tau‘a e ‘avea i Papelonia e le tupu o Papelonia, ‘ina ‘ia lapata‘i atu ‘iā te i latou e pei ‘ona poloa‘iina mai ‘iā te ia e le Atua. ‘Ona o agasala na ‘outou agasala ai i luma o le Atua, o le a ‘avea ‘outou fa‘apologa i Papelonia e Nepukanesa, le tupu o Papelonia.
2 A o‘o atu lava ‘outou i Papelonia, tou te nonofo ai i tausaga e tele ma aso e fa‘alevaleva, e o‘o atu lava i tupulaga e fitu; a mavae atu lea, ‘ona ‘ou lavea‘i lea ‘iā te ‘outou ma le manuia.
3 A o lenei o le a iloa atu e ‘outou i Papelonia ni atua e gaosi i le auro, ma le ario, i ma‘a ma la‘au, ‘ua fataina i latou i tau‘au o tagata, ‘ua fa‘atupu a‘i le mata‘u i nu‘u ‘ese.
4 ‘Ia ‘outou lava, ne‘i mulimuli atu ‘outou i na faiga a tagata ‘ese, i le mata‘u i ai ma le lavea ‘outou i le fefe i ai.
5 A ‘outou iloa atu le vao tagata i tua ma luma o tupua, ‘ia ‘outou ifo atu o fa‘apea ifo i o ‘outou loto: Le Ali‘i e, o oe lava ‘ua tatau ‘ona ifo i ai.
6 Auā o la‘u agelu ‘ua fa‘atasi ma ‘outou; a o a‘u lava ‘ou te taui ma sui mo o ‘outou ola.
7 Auā o mea pepelo o latou laulaufaiva ‘ua fa‘alamolemoleina e le tufuga; e ui ‘ina lanu i le auro po o le ario, a ‘ua lē mafai ‘ona gagana mai.
8 E pei ‘ona faia i se teine ‘ua naunau i teuga, e fa‘apea ‘ona ‘aumaia se auro ma ‘ua gaosia ai i latou.
9 E i ai lava pale auro i ulu o latou atua; ‘ae ‘ave‘ese ai e ositaulaga le auro ma le ario, ‘ua fa‘aaogāina mo i latou lava.
10 ‘Ua latou tu‘u atu ai i fafine talitane, ‘ua latou fai ai teuga o fafine agasala; ‘ae a toe ‘aumaia fo‘i e fafine talitane, ‘ua teuina ai o latou atua.
11 E lē fa‘asaoina fo‘i i latou i le ‘ele po o le mogamoga.
12 A ufitia i latou i le ‘ofu pāuli, e sōloia lava o latou mata ‘ona o le pefu o le fale ‘ua mafiafia ‘iā i latou.
13 ‘Ua i le tasi le to‘oto‘o o le pule, e pei o se tagata, e pei o le fa‘amasino fa‘aitumālō, ‘ae lē fa‘ao‘o lava le oti i lē ‘ua fāifai ‘iā te ia.
14 O le tasi ‘ua i lona lima le pelu ma le to‘i, ‘ae na te lē lavea‘i ‘iā te ia lava a‘i tagata tau po o tagata gaoi.
15 ‘Aua la ne‘i ‘outou matata‘u i ai. Auā e pei ‘ona fa‘alēaogāina le ipu ‘omea a se tagata pe a ta‘e, e fa‘apea lava o latou atua.
16 A fa‘atūina i latou i se malumalu, e tumu o latou mata i le pefu mai vae o ē ulu atu i ai.
17 E pei fo‘i ‘ona punitia faitoto‘a e puipui i ai le tagata ‘ua na ‘upuleagaina le tupu, po o le tagata oti a tu‘uina i le tu‘ugamau; e fa‘apea ‘ona fa‘amauina e ositaulaga o faitoto‘a i ni fa‘amau fa‘alava ma ni loka, ‘ina ne‘i vetea o latou atua e tagata gaoi.
18 ‘Ua tutu mo i latou ni molī e matuā tele lava, ‘ae latou te lē mafaia ‘ona va‘ai i se malamalama, a ‘ua pei o ni pou i se fale.
19 ‘Ae fai mai ‘ua etoeto o latou fatu e gata ‘ua tutupu mai i le ‘ele‘ele, ‘ua ‘ai lava ‘iā i latou ma o latou ‘ofu, ‘ae latou te lē lagona lava.
20 ‘Ua uliuli o latou mata i le asu e alu a‘e i le fale.
21 E felelei o lulu i o latou tino ma o latou ulu, e fa‘apea o pe‘ape‘a ma isi manulele, e feoa‘i ai ma gose.
22 ‘Ia iloa ai e ‘outou e lē ni atua i latou; ‘aua lava ne‘i ‘outou matata‘u i ai.
23 E o‘o lava i le auro, ‘ua na ‘ona fa‘alialia ai, e lē ‘i‘ila se‘iloga ‘ua mua‘i sōloi‘esea ai le ‘ele; na fa‘asuāvaia i latou i le afi, latou te le‘i lagona lava.
24 Na fa‘atauina mai i latou i se tau matuā tele, a ‘ua leai se mānavaga ola i totonu o i latou.
25 ‘Ua leai ni o latou vae, ‘ua fata i latou i tau‘au, o fa‘aali fa‘apea i tagata lo latou fa‘atauva‘a; ‘ia māsiasi fo‘i o ē ‘au‘auna atu i ai!
26 ‘Āfai ‘ua palasi i latou i lalo, e lē toe tutū a‘e lava latou; ‘āfai fo‘i e toe fa‘atūina i latou, e lē tutū lava i lo latou malosi; ‘ae ‘aumaia ni taulaga ‘iā te i latou, e pei ‘ona ‘aumaia i tagata oti.
27 O taulaga e molia ai, e fa‘atauina atu e o latou ositaulaga ma ‘ua fa‘aaogāina mo i latou lava; e fa‘apea fo‘i o tufa‘aga e ‘ave e a latou avā, e lē maua ai sina mea mo le tagata ma‘i po o le tagata mativa.
28 O a latou taulaga e pa‘i atu i ai o fafine totō ma ē mama‘i i le ma‘i o fafine. E iloa ai lava e ‘outou e lē ni atua i latou, ‘aua la le matata‘u i ai.
29 Auā e ta‘ua i latou ni atua i se ā? Auā e faitaulaga o fafine i atua ario, ma atua auro ma atua la‘au;
30 e nonofo ositaulaga i o latou malumalu, o māsaesae o latou ‘ofu, o selea a latou ‘ava, ‘ua lē ufitia o latou ulu.
31 ‘Ua latou fa‘ataiō o ‘alalaga atu i o latou atua, e pei ‘ona fai i faiga ‘ai mo le tagata oti.
32 E ‘ave‘esea lava ‘ofu o tupua e ositaulaga e fa‘a‘ofu a‘i a latou avā ma a latou fānau.
33 A fa‘ao‘o fo‘i ‘iā i latou se leaga po o se lelei e se tasi, latou te lē mafaia ‘ona taui ma sui i ai; latou te lē mafaia ‘ona fa‘anofoina se tupu pe fa‘ate‘a o ia.
34 E fa‘apea lava ‘ona latou lē mafaia ‘ona foa‘i mai se ‘oloa, pe taui atu i se leaga. A se tasi ‘ua fai i ai lana tautō ma ‘ua lē avatua, latou te lē taui atu fo‘i i lea mea.
35 latou te lē lavea‘i le tagata a‘i le oti, e lē fa‘asao fo‘i e i latou le tagata vaivai a‘i lē malosi.
36 Latou te lē toe fa‘afepulafi o ē tauaso, latou te lē lavea‘i le tagata i le fa‘alavelave.
37 Latou te lē alolofa mai i le fafine ‘ua oti lana tane, latou te lē agalelei atu i ē mātuaoti.
38 ‘Ua tusa o latou atua ma ma‘a o le mauga; e gaosia tupua i le la‘au, le ma‘a, le auro ma le ario; a o ē ‘au‘auna atu i ai, e māsiasi i latou.
39 Fa‘apefea la ‘ona manatu se tasi pe fai mai o ni atua i latou?
40 E o‘o lava i tagata Kaletaia ‘ua latou lē fa‘aaloalo i tupua; auā a fa‘alogo e i ai se gūgū ‘ua lē mafai ‘ona tautala, ‘ua latou momoli ‘iā te ia ‘iā Pele ma ‘ua latou tagi atu ‘ia tautala i ai;
41 pe la ‘ua mafai ‘ona fa‘alogologo lē ‘ua lē mafai ‘ona gāoioi! ‘Ana malamalama fo‘i i latou, po ‘ua latou tu‘ulafoa‘i i o latou atua, auā o ni atua e lē o i ai ni fa‘alogo‘aga.
42 O fafine fo‘i ‘ua noatia i maea ‘ua latou nonofo i auala, o susunu ni fatu olive;
43 ‘āfai o se tasi o i latou e tōsina e se tasi ‘ua alu ane, ma ‘ua la moemoe, ‘ona ia tauemu lea i lē la te tuā‘oi, ‘ona ‘ua lē ta‘uaogāina e pei lava o ia, ma ‘ua lē tatalaina lana mea.
44 ‘Ua pepelo lava o mea uma ‘ua faia ‘iā te i latou, fa‘apefea ‘ona manatu se tasi pe fai mai o ni atua i latou?
45 ‘Ua gaosia i latou e tufuga ma ē fai mea auro; e lē o se tasi mea i latou, a o le mea lava e mana‘o i ai ositaulaga.
46 A o tufuga ‘ua latou gaosia, e pu‘upu‘u fo‘i o latou lava olaga; o ni atua fa‘apefea o mea ‘ua gaosia e i latou?
47 ‘Ua latou tu‘ua i ē mulimuli ‘iā i latou o mea pepelo ma le tauemuga.
48 Auā a pesi mai se tau‘a po o se tasi mala, ‘ona mafaufau lea o ositaulaga i se mea e lalafi ai i latou ma o latou atua.
49 E mafai fa‘apefea ‘ona manatu se tasi o ni atua i latou, ‘ua lē mafai ‘ona lavea‘i ‘iā te i latou lava i le tau‘a, pe ‘alo ‘ese i latou i isi mala?
50 Auā o le la‘au lava i latou, ‘ua vali auro ma vali ario, ‘ae mautinoa lava i aso amulī e nu‘u uma ma tupu uma lava, o mea pepelo i latou; auā ‘ua manino lelei e lē ni atua i latou, a o galuega a lima o tagata, i le ‘ua leai se mana atua ‘iā i latou.
51 O le mea lava lea ‘ua mautinoa ai e lē ni atua i latou, a o galuega a lima o tagata, ma ‘ua leai ‘iā te i latou sina mana atua.
52 Latou te lē fa‘anofo se tupu i le nu‘u, latou te lē fa‘atō ifo fo‘i se ‘ua i tagata.
53 Latou te lē fa‘amasinoina le mea tonu, e lē lavea‘iina fo‘i se nu‘u e i latou a‘i le fa‘asauā, auā latou te lē lavātia se mea e tasi; e pei o ni oreva mate i latou o tautau i le vā o le lagi ma le lalolagi.
54 Auā a pa‘ū ifo le afi i le fale o atua ‘ua faia i la‘au, i le ario ma le auro, e sōsōla lava a latou ositaulaga, ‘ia lavea‘iina ai i latou; a o i latou e susunuina e pei o se utupoto i totonu o le fale.
55 Latou te lē tutū i luma o tupu, i aso o le tau‘a, fa‘apefea la ‘ona manatu pe talitonu se tasi o ni atua i latou?
56 O atua ‘ua faia i le la‘au, i le ma‘a, i le auro po o le ario, e lē fa‘aola i latou ‘iā i latou ai tagata gaoi po o tagata faomea; e sili lo latou malosi i lo atua ia;
57 latou te faoa le auro, le ario ma ‘ofu ‘ua fa‘a‘ofuina ai, ‘ona ō lea i latou ma ‘ua lē fesoasoani mai se atua ‘iā te ia lava.
58 O le mea lea, e lelei le tupu na te fa‘aalia lona malosi, po o le ipu e fa‘aaogāina i le fale ma ‘ua mitamita ai lē pule i ai; e lelei le faitoto‘a o le fale e puipuia ai o mea ‘ua i totonu, ‘ae leaga o atua pepelo.
59 O le lā o le masina ma fetū ‘ua fepulafi i latou, ‘ua ‘auina mai ‘ina ‘ia aogā i tagata, a ‘ua ‘ana‘ana i latou.
60 E fa‘apea fo‘i le uila pe a ‘emo mai, e segia ai mata; e fa‘apea ma le matagi, e agi i nu‘u uma lava;
61 o ao fo‘i ‘ua poloa‘iina i ai e le Atua ‘ia feoa‘i i le lalolagi ‘atoa uma, ‘ua latou ‘ana‘ana i le poloa‘i ‘ua o‘o mai ‘iā i latou.
62 O le afi fo‘i ‘ua fa‘atō ifo mai i lugā na te susunu le mauga ma le vaomatua, ‘ua tu lava ia i poloa‘iga; a o atua ia e lē tutusa ma se tasi o i latou nā i le tino lelei po o le malosi.
63 O le mea lava lea e lē tatau ‘ona tāofi ifo ai pe ta‘uta‘u ai i latou ni atua, ‘ona ‘ua lē mafai ‘iā i latou ‘ona fai se fa‘amasinoga pe fai se mea e tasi i tagata.
64 ‘Aua la tou te matata‘u i ai, e iloa tino e lē ni atua i latou.
65 Auā latou te lē fetu‘u atu i ‘upu pe fa‘amanuia ‘iā i latou.
66 Latou te lē fa‘aali mai fo‘i i tagata ni fa‘ailoga i le lagi; e lē fepulafi i latou e pei o le lā, e lē malamalama i latou e pei o le masina.
67 ‘Ua sili ‘iā te i latou o manu ‘ua mafai ‘iā i latou ‘ona lalafi ma puipui ‘iā te i latou lava.
68 O lea, ‘ua leai lava se fa‘ailoga e tasi o ni atua i latou; o le mea lea, ‘ia ‘aua ne‘i ‘outou matata‘u i ai.
69 Auā e pei o le tapui e lē puipuia a‘i se mea i se togāla‘au, e fa‘apea o o latou atua la‘au po o atua vali auro.
70 ‘Ua pei o se la‘au tuitui i le fa‘ato‘aga, ‘ua tutū i ai o manu felelei uma; o latou atua la‘au, po o atua vali auro po o le vali ario, ‘ua tutusa ma se tino oti ‘ua lafoa‘iina i le pouliuli.
71 O le ‘ofu pāuli ma le ‘ie silika e pala i o latou tino tou te iloa tino ai e lē ni atua i latou; e i‘u lava ‘ina ‘aina fo‘i i latou e anufe e ‘avea ai i latou ma tauemuga o le nu‘u.
72 Sili lava le tagata amiotonu ‘ua leai sona tupua, ‘aua e tu mamao lava ia ma tauemuga!