1 O le tasi tagata e ‘āiga ma le tane a Naomi, o le tagata mau‘oa tele, o le ‘āiga o Elimeleka, o Poasa lona igoa.
2 ‘Ua fai atu Ruta le Moapi ‘iā Naomi, “So‘u alu i se fanua, ma ao ai ni fua o le karite, o mulimuli i sē alofa mai ‘iā te a‘u.”‘Ua fai mai o ia ‘iā te ia, “La‘u tama e, ‘inā alu ia.”
3 ‘Ua alu, ‘ua o‘o i ai, ‘ua ao karite i le fanua, o lo‘o mulimuli i ē selesele; ‘ua so‘ona alu i le fasi fanua o Poasa, o le ‘āiga o Elimeleka.
4 Fa‘auta fo‘i, ‘ua sau Poasa mai Peteleema ‘ua fai mai i ē selesele, “‘Ia ‘iā te ‘outou le ALI‘I!”‘Ua latou fai atu fo‘i ‘iā te ia, “‘Ia fa‘amanuia oe e le ALI‘I!”
5 ‘Ua fai mai Poasa i le taule‘ale‘a sa tofia e pule i ē selesele, “O ai ‘ea lenā teine?”
6 ‘Ua tali atu le taule‘ale‘a sa tofia e pule i ē selesele, ‘ua fa‘apea, “O le teine Moapi lenā, ‘ua fo‘i mai ma Naomi mai le nu‘u o Moapi.
7 Na fai mai o ia, ‘So‘u ao ma fa‘aputu i le vā o fusi karite, ma mulimuli atu i ē ‘ua selesele;’ ‘ona alu ai lea, ‘ua tumau ai talu le taeao ‘ua o‘o i lenei itū la o lo‘o mapu fa‘aitiiti i le fale.”
8 ‘Ua fai atu Poasa ‘iā Ruta, “‘E te lē fa‘alogo mai ‘ea lo‘u afafine e? ‘aua ‘e te alu e ao i se tasi fanua ‘ese, ‘aua fo‘i ‘e te tu‘una le mea nei, a ‘ia e tumau ‘i‘inei ma a‘u ‘au‘auna fafine;
9 ‘e te va‘ai atu i le fanua latou te selesele ai, ‘e te mulimuli atu ‘iā te i latou; na ‘ou le poloa‘i ‘ea i taulele‘a, ‘aua latou te agaleaga ‘iā te oe? A ē fia inu, alu ia oe i vai ma inu ai i mea ‘ua utu a taulele‘a.”
10 ‘Ona fa‘apa‘ū faō ai lea o ia, ‘ua ifo to‘ele, ‘ua fai atu ‘iā te ia, “Se a le mea ‘ua e alofa mai ai ‘iā te a‘u ma e silasila mai ai ‘iā te au, o a‘u fo‘i le tagata ‘ese?”
11 ‘Ua tali mai Poasa, ‘ua fai mai ‘iā te ia, “‘Ua uma ‘ona fa‘aali mai ‘iā te a‘u mea uma ‘ua e faia i le tinā o lau tane talu ‘ina oti o lau tane; ma ‘ua e tu‘ulafoa‘i i lou tamā, ma lou tinā, ma le nu‘u na fānau ai oe, a ‘ua e sau i le nu‘u ‘e te le‘i iloa anamua;
12 ‘ia totogi e le ALI‘I i lau galuega, ‘ia tu‘uina mai ‘iā te oe se taui tele mai le ALI‘I le Atua o Isaraelu, ‘ua e sau e fa‘atuatua i lalo o ona ‘apa‘au.”
13 ‘Ua fai atu o ia, “‘Ua alofaina a‘u e oe, le ali‘i e, auā ‘ua e fa‘amafanafana mai ‘iā te āu ma ‘ua e tautala lelei i lau ‘au‘auna fafine, o a‘u fo‘i, ‘ou te lē pei o se tasi o au ‘au‘auna fafine.”
14 ‘Ua fai mai Poasa ‘iā te ia, “A o‘o i le itū la e ‘a‘ai ai, ‘e te fa‘alatalata mai ‘i‘inei ma ‘ai ni areto, ma fufui āu mea e ai i le vineka;” ‘ona nofo fa‘atasi ai lea o ia ma ē selesele, ‘ua na avatu ‘iā te ia le saito ‘ua tunu, ‘ua ia ‘ai ai, ‘ua mā‘ona ‘ua totoe.
15 ‘Ua tula‘i o ia e ao; ‘ona fai atu lea o Poasa i ona taulele‘a, ‘ua fa‘apea, “‘Ia ao lava e ia i vā o fusi karite, ‘ae ‘aua lē fa‘amā ‘iā te ia;
16 ‘ia tō mai fo‘i ni lu‘utaga, ma tu‘u māna ‘ina ‘ia ao e ia, e ‘aua le vavao atu ‘iā te ia.”
17 ‘Ua ao e ia i le fanua ‘ua o‘o i le afiafi, ‘ona sasa ai lea o mea na ia fa‘aputuina, ‘ua tusa ma le efa o karite.
18 ‘Ona si‘i a‘e ai lea e ia, ‘ua alu i le ‘a‘ai, ‘ua fa‘aali atu i le tinā o lana tane le mea na fa‘aputuina e ia; ‘ua na avatu fo‘i ‘iā te ia le mea na totoe ‘ina ‘ua mā‘ona o ia.
19 ‘Ua fai mai le tinā o lana tane ‘iā te ia, “Po o fea na e ao ai mea i le asō? po o fea na e galue ai? ‘ia manuia o ia na alofa mai ‘iā te oe.”‘Ona ta‘u atu ai lea i le tinā o lana tane o le tagata na ia galue i lona fanua, ma na fai atu, “O le igoa o le tagata na ‘ou galue ai i lona fanua i le asō, o Poasa.”
20 ‘Ua fai mai Naomi i le avā a lana tama, “‘Ia fa‘amanuia o ia e le ALI‘I, auā ‘ua lē uma lona alofa i ē ola ma ē ‘ua oti.” ‘Ua fai mai fo‘i Naomi ‘iā te ia, “‘Ua tatou ‘āiga ma ia, o ia fo‘i o so latou e i ai le tausi tama.”
21 ‘Ua fa‘apea atu fo‘i Ruta le Moapi, “‘Ua fai mai fo‘i o ia ‘iā te a‘u, ‘‘E te fa‘atasi ma o‘u taulele‘a, se‘ia latou fa‘auma i o‘u seleselegāsaito uma lava.’”
22 ‘Ua fai mai Naomi ‘iā Ruta le avā a lana tama, “La‘u tama e, e lelei ‘ina ‘ia ‘outou feoa‘i ma ana ‘au‘auna fafine, ‘aua ne‘i latou iloa oe i se tasi fanua.”
23 ‘Ua fa‘atasi o ia ma ‘au‘auna fafine a Poasa e ao mea; ‘ua o‘o ‘ina ‘ua uma o le seleselegākarite ma le seleselegāsaito; ‘ua la mau fo‘i ma le tinā o lana tane.