Baefese

¹Le fele le be baetsisi ba Modimo, kaha le le bana ba ratwang; ²mme le tsamaye leratong, jwalokaha Kreste le yena a re ratile, mme a ineetse bakeng sa rona, hore e be nyehelo le sehlabelo se monko o monate ho Modimo. ³Empa haele bofebe, le ditshila tsohle, le takatso ya moruo, ho se ke ha bolelwa le mabitso a tsona hara lona, kamoo ho tshwanelang bahalaledi kateng; ⁴leha e le taba e dihlong, leha e le ya bowatla, leha e le ya meswaso e mebe, e leng taba tse sa tshwanelang; ho mpe ho utlwahale diteboho. ⁵Hobane le a tseba hore mofebi, leha a le mong, le ya ditshila, le ya ratang leruo, e leng motho ya sebeletsang medimo ya bohata, ha ba na kabelo mmusong wa Kreste le Modimo. ⁶Motho a se ke a le thetsa ka dipolelo tsa lefeela; hobane ke ka baka la ntho tseo bohale ba Modimo bo tlelang bana ba ho se dumele. ⁷Ka baka leo, le se ke la ba le taba le bona. ⁸Hobane kgale le ne le le lefifi, empa jwale le lesedi Moreneng; tsamayang ke hona jwaloka bana ba lesedi. ⁹Hobane tholwana ya lesedi ke molemo wohle, le ho loka, le nnete. ¹⁰Le qamake se ka kgahlisang Morena; ¹¹mme le se ke la ba le kabelo mesebetsing e nyopang ya lefifi, le mpe le e nyatse: ¹²hobane le ho bolelwa tseo ba di etsang sephiring ke taba e hlabisang dihlong. ¹³Empa ntho tseo tsohle ha di kgalemelwa, di bonahatswa ke lesedi; hobane hohle ho bonahatswang, ho lesedi. ¹⁴Ke ka baka leo ho itsweng: Tsoha, wena morobadi, tloha hara bafu, mme Kreste o tla o bonesetsa. ¹⁵Ha ho le jwalo, iponeleng hore le tsamaye ka kelello, e seng jwaloka mawatla, e mpe e be jwaloka ba bohlale. ¹⁶Lopollang dinako, hobane mehla e se e le mebe. ¹⁷Ka baka leo, le se ke la etsa ka bowatla, le mpe le tsebisise hantle ho ratwang ke Morena. ¹⁸Mme le se ke la tahwa ke veine, hobane bohlola bo teng ho yona; le mpe le tlale Moya. ¹⁹Buisanang ka dipesalema, le ka difela, le ka dipina tsa moya, mme le binele Morena, le mo dudueletse ka dipelong tsa lona. ²⁰Le lebohe kamehla Modimo, Ntata rona, ka baka la ntho tsohle, ka lebitso la Jesu Kreste, Morena wa rona.

Ditshwanelo tsa ntlo.

²¹Ikokobetseng e mong ho e mong, le ntse le tshaba Kreste. ²²Lona basadi, le ikokobetse katlasa banna ba lona, jwalokaha le ikokobetsa ho Morena; ²³hobane monna ke hlooho ya mosadi, jwalokaha Kreste le yena e le hlooho ya kereke, mme ke yena Mmoloki wa mmele wa hae. ²⁴Jwalokaha kereke e ikokobetsa katlasa Kreste, basadi le bona ba ikokobetse ho banna ba bona jwalo nthong tsohle. ²⁵Lona banna, ratang basadi ba lona, jwalokaha Kreste le yena a ratile kereke, mme a iteletse lefu ka baka la yona; ²⁶hore a tle a e halaletse, ha a se a e ntlafaditse ka hlatsuo ya metsi ka lentswe la hae, ²⁷a tle a ikemisetse yona pela hae, e le kereke e kganyang, e se nang letheba le letsika, leha e le letho le jwaloka tseo; e mpe e be e halalelang, e se nang sekodi. ²⁸Ke ka mokgwa o jwalo le bona banna ba tshwanetseng ho rata basadi ba bona jwaloka mmele wa bona. Ya ratang mosadi wa hae, eba o a ithata. ²⁹Hobane ha ho eso ho be motho ya kileng a hloya nama ya hae le ka mohla o le mong; empa o ye a e fepe, a e baballe, jwalokaha Kreste le yena a etsa kereke. ³⁰Hobane re ditho tsa mmele wa hae. ³¹Ke ka baka leo ho ngodilweng, ho thwe: Monna o tla tlohela ntatae le mmae, a kgomarele mosadi wa hae, mme ba babedi e tla ba nama e le nngwe feela. ³²Sephiri sena se seholo; empa ke bua ke ntse ke lekanya Kreste le kereke. ³³Leha ho le jwalo, e mong le e mong ho lona a fele a rate mosadi wa hae jwalokaha a ithata, mme mosadi yena a hlomphe monna wa hae.