Bafilipi

¹Ka baka leo, ekare ha tshediso e le teng ho Kreste, ha ho le kgothatso ya lerato, ha ho le kopano ya Moya, ha ho le lereko le mehauhelo, ²le ke le phethise thabo ya ka, ka ho ba le kgopolo e le nngwe, le lerato le le leng, le moya o le mong, le ho ikutlwa ho le hong feela. ³Le se ke la etsa letho ka kgang, leha e le ka boithoriso ba lefeela, empa e mong le e mong, ka boikokobetso, a lekanye hobane ba bang ba mo fetisa. ⁴E mong le e mong a se ka a hlokomela tseo e leng tsa hae feela, a mpe a hlokomele le tseo e leng tsa ba bang. ⁵Le fele le be le pelo e bileng le ho Jesu Kreste; ⁶eo leha a ne a ema ka sebopeho sa Modimo, a sa kang a lekanya hobane o a utswa ha a iketsa ya lekangang le Modimo; ⁷athe o iphedisitse ka ho nka sebopeho sa mohlanka, ka ho iketsa ya tshwanang le batho. ⁸Mme ha a hlahile a le jwaloka motho, o ikokobeditse, a iketsa ya utlwang ho isa lefung, e, le lefung la sefapano. ⁹Ke ka baka leo Modimo o mo phahamisitseng ka ho fetisa, mme o mo neile lebitso le hodima mabitso wohle; ¹⁰hore lebitsong la Jesu, mangwele wohle a ba mahodimong, le lefatsheng, le katlase ho lefatshe, a kgumame; ¹¹mme maleme wohle a bolele hore Jesu Kreste ke Morena, e be tlotliso ya Modimo Ntate. ¹²Baratuwa ba ka, jwalokaha le bile le kutlo kamehla, le fele le sebetse polokeho ya lona ka tshabo le ka thothomelo, e seng feela ha ke le ho lona, empa haholoholo leha ke le siyo; ¹³hobane Modimo ke wona o sebetsang ka ho lona ho rata le ho etsa, ka boithatelo ba wona. ¹⁴Etsang tsohle le sa ngongorehe, le sa dikadike; ¹⁵le tle le hloke sekodi le letheba, le be bana ba Modimo, ba sa nyatseheng hara moloko o senyehileng, o kgopo, oo le kganyang hara wona jwaloka masedi lefatsheng, le ntse le phahamisitse lentswe la bophelo; ¹⁶ke tle ke tsebe ho ithorisa ka letsatsi la Kreste, ka hore ha ke a ka ka mathela lefeela, leha e le ho sebeletsa lefeela. ¹⁷Ekasita leha madi a ka a ka tshelwa sehlabelong le kananelong ya tumelo ya lona, teng nka thaba, ka thaba le lona bohle. ¹⁸Le lona, le thabele hona hoo, le thabe le nna.

Ho roriswa Timothea le Epafrodite ba tla romelwa Filipi.

¹⁹Ke tshepile ho Morena Jesu hobane ke tla phakisa ke le romele Timothea, ke tle ke kgothahale, ha ke utlwa kamoo taba tsa lona di dutseng kateng. ²⁰Hobane ha ke na e mong eo pelo ya hae e tshwanang le ya ka jwaloka yena, leha e le ya hlokomelang taba tsa lona ka sebele jwaloka yena. ²¹Hobane bohle ba ipatlela tsa bona, e seng tsa Jesu Kreste. ²²Empa yena, le tseba diketso tsa hae, kamoo a ntshebeleditseng Evangeling kateng, jwoloka ngwana ha a sebeletsa ntatae. ²³Ke yena eo jwale ke tshepileng ho mo romela ho lona, ha ke se ke bone tseo ke leng hara tsona hore na di feletse kae. ²⁴Hape, ke kgolwa Moreneng hoba le nna ke tla tla kapele ho lona. ²⁵Empa ke lekantse hobane e ka kgona ke le romele Epafrodite, ngwaneso le motlatsi wa ka mosebetsing le hlabanong, lenqosa la lona le ho nna, le mmaballi wa ka bohloking. ²⁶Hobane o ne a le hlolohetswe haholo bohle, mme o ne a belaela haholo kahobane le utlwile ho kula ha hae. ²⁷O fela a kile a kula, a batla a eshwa; empa Modimo o mo hauhetse, e seng yena a nnotshi, empa le nna, hore ke tle ke se ke ka imelwa ke mahlomola a kallanang. ²⁸Ke phakisitse ka mo romela ho lona ke hona, hore, ha le boela le mmona, le ke le thabe, mme le nna ke lese ho hlomoha. ²⁹Le fele le mo amohele Moreneng ka thabo yohle, mme le hlomphe batho ba jwalo. ³⁰Hobane o kile a atamela lefu ka baka la mosebetsi wa Kreste, a tedile ho phela ha hae, a tle a tlatse tseo le neng le sitwa ho nketsetsa tsona.