1 Nna, Pauluse, moholehuwa wa Jesu Kreste, ke ena le Timothea, ngwaneso, ke ngolla wena, Filemone, moratuwa le mosebedisi wa rona,
2 le Afia, ya ratwang, le Arkipe, molekane wa rona hlabanong, le kereke e ka tlung ya hao, ke re:
3 Le ke le newe mohau le kgotso ke Modimo, Ntata rona, le ke Morena Jesu Kreste!
4 Ke leboha Modimo wa ka kamehla, ha ke ntse ke o hopola merapelong ya ka,
5 kamoo ke utlwang tumelo ya hao ho Morena Jesu kateng, le lerato la hao ho bahalaledi bohle.
6 Ke kopa hore tumelo ya hao, eo re kopaneng le wena ka yona, e tle e sebetse ka matla, o tle o bontshise molemo wohle o ka etsetswang Jesu Kreste ha heno.
7 Efela, re na le thabo le tshediso e kgolo leratong la hao, kahobane dipelo tsa bahalaledi di kgatholotswe ke wena, ngwaneso.
8-9 Ka baka leo, leha ke ena le tokelo e kgolo, ka baka la Kreste, ya ho o laela se o tshwanelang, ke ikgethetse, ka baka la lerato, ho o rapela, nna, ke leng Pauluse, monna ya hodileng, ya bileng a tlamilwe tshiung tsena ka baka la Jesu Kreste:
10 ke rapella ho wena Onesima, ngwanaka, eo ke mo tswetseng ke le ditlamong,
11 ya neng a se na thuso ho wena pele, empa jwale o na le thuso ho wena le ho nna, mme ke mo kgutlisetsa ho wena.
12 Mo amohele hle, hobane ke pelo ya ka ka sebele.
13 Ke ne ke hopotse hore nka mo thibela hore a dule le nna, a tle a ntshebeletse bakeng sa hao, ditlamong tsa Evangeli;
14 empa ha ke a ka ka rata ho etsa letho ke eso ho tsebe molomo wa hao, hore botle boo ba hao bo se ke ba etswa ke wena ka ho qophellwa, e mpe e be ka ho ithatela ha hao.
15 Hape, ekaba ha a ile a kgaohana le wena ka nakwana e kgutshwanyane, e ne e le hore o tle o boele o be le yena kamehla;
16 e tle e se ke ya hlola e eba mohlanka, e mpe e be ya fetisang mohlanka, e be moena ya ratwang, haholo ke nna, haholoholo ke wena ka nqeng ya nama le ka nqeng ya Morena!
17 Jwale he, ha ke le motswalle wa hao, mo amohele hle, jwaloka hoja e le nna.
18 Mme leha ekaba a kile a o tlatlapa ka hore hoitseng, kapa a na le molato ho wena, o ke o o batle ho nna.
19 Nna, Pauluse, ke ngodileng hona hoo ka letsoho la ka, ke tla o lefa, leha ke sa o bolelle hore o molato ho nna, wena, ka sebele sa hao.
20 E, ngwaneso, a nke ke thabiswe ke wena Moreneng, o kgatholle pelo ya ka ho Kreste.
21 Ke o ngoletse tseo, ke ntse ke tshepile kutlo ya hao, mme ke a tseba hore o tla etsa le ho fetisa seo ke se boletseng.
22 Hape, o ntokisetse ntlo; hobane ke tshepile hore ke tla le newa ka merapelo ya lona.
23 Epafrase, ya tlamilweng le nna ka baka la Jesu Kreste, o a o dumedisa;
24 o na le Mareka, le Aristarke, le Demase, le Luka, basebedisi ba ka.
25 Mohau wa Morena wa rona Jesu Kreste o be le meya ya lona! Amen!