Luka

³⁴Hobane, moo letlotlo la lona le leng teng, ke moo le dipelo tsa lona di tla ba teng. ³⁵Matheka a lona a tlangwe, mme mabone a lona a tuke. ³⁶Le lona le be jwaloka batho ba lebeletseng morena wa bona hore na o tla kgutla neneng bohading, hore, etlere ha a fihla, a kokota, ba mmulele hanghang. ³⁷Ho lehlohonolo bahlanka bao, morena ha a fihla, a tla ba fumana ba fadimehile! Kannete ke re ho lona: O tla itlama, a ba dudise dijong, mme o tla atamela, a ba sebeletse. ³⁸Leha a ka tla tebelong ya bobedi, leha a ka tla tebelong ya boraro, mme a ba fumana ba le jwalo, ho lehlohonolo bahlanka bao. ³⁹Le lemohe hoba, hola monga ntlo a ka tseba nako eo leshodu le tla tla ka yona, a ka lebela, a se ke a lesa ntlo ya hae ya phunngwa. ⁴⁰Jwale, le lona le itokise; hobane Mora motho o tla tla ka nako eo le sa e hopolang.