1 Jwale Jesu, a tletse Moya o Halalelang, a tloha Jordane, a iswa ke Moya feelleng.
2 A lekwa teng ke Diabolose ka matsatsi a mashome a mane, a sa je letho ka matsatsi ao; a ntoo lapa ho feleng ha wona.
3 Yaba Diabolose o re ho yena: Ekare ha o le Mora Modimo, ere, lejwe lena le fetohe bohobe.
4 Jesu a mo araba, a re: Ho ngodilwe, ho thwe: Motho a ke ke a phela ke bohobe feela, o tla phela le ke dipolelo tsohle tsa Modimo.
5 Yaba Diabolose o mo isa thabeng e telele, a mmontsha mebuso yohle ya lefatshe ka motsotso o le mong.
6 Diabolose a re ho yena: Ke tla o nea borena boo bohle, le kganya ya mebuso eo, etswe ke di neilwe, mme ke di nea eo ke ratang ho mo nea.
7 Mme jwale, wena, ha o kgumama pela ka, tsohle e tla ba tsa hao.
8 Jesu a mo araba a re: Tloha ho nna, Satane, hobane ho ngodilwe, ho thwe. O tla kgumamela Morena, Modimo wa hao, o sebeletse yena feela.
9 Jwale, Diabolose a mo isa Jerusalema, a mmea hlorong ya tempele, a re ho yena: Ekare ha o le Mora Modimo, o itihele fatshe o le mona;
10 hobane ho ngodilwe, ho thwe: O tla o laella mangeloi a hae, a o boloke;
11 mme a tla o kgakeletsa matsohong a wona, hore leoto la hao le se ke la kgoptjwa ke lejwe.
12 Jesu a mo araba, a re: Ho boletswe, ho thwe: O se ke wa leka Morena, Modimo wa hao.
13 Eitse hobane Diabolose a qete moleko wohle, a mo tlohela, nako e nngwe e tle e be e fihle.
14 Yaba Jesu o boela Galelea ka matla a Moya; mme botumo ba hae ba utlwahala mathokong wohle a naha eo.
15 O ne a ruta masinagogeng a bona, a ntse a roriswa ke bohle.
16 A fihla Nasaretha, moo a neng a holetse teng. Ka letsatsi la Sabatha, a kena sinagogeng ka mokgwa wa hae; mme a ema hore a bale.
17 Yaba o newa buka ya moporofeta Esaia; mme ha a phutholotse buka, a fihlela sebaka moo ho ngodilweng, ho thwe:
18 Moya wa Morena o ho nna, kahobane o ntlotsitse; o nthomile ho bolella mafutsana Evangeli, ho fodisa ba pelo tse bohloko, ho bolella ba holehilweng hore ba tla lokollwa, le ba foufetseng hore ba tla boela ba bone, ho nea ba hloriswang sebaka sa ho ikela,
19 le ho bolela selemo sa Morena se molemo.
20 Eitse hobane a phuthe buka, a e nea mohlanka, mme a dula; mahlo a bohle ba leng sinagogeng a nna a tadima yena.
21 Yaba o qala ho ba bolella, a re: Kajeno, lengolo leo le etsahetse, le a ikutlwela.
22 Ba mo pakela bohle, ba makala ke mantswe a molemo a tswang molomong wa hae, ba re: Enwa na hase mora wa Josefa na?
23 A re ho bona: Efela le sa tla mpolella setshwantsho se reng: Ngaka, o iphodise e le wena; ntho tseo re di utlwileng di etseditswe Kapernauma, o etse tse kalo le mona naheng ya heno.
24 A mpa a re: Kannete ke re ho lona: Ha ho moporofeta ya amohelwang naheng ya habo.
25 Kannete ke re ho lona: Basadi ba bahlolohadi ba bangata ba ne ba le teng Iseraeleng, mehleng ya Elia, mohla lehodimo le kwalwang ka dilemo tse tharo le dikgwedi tse tsheletseng, mme tlala e kgolo ya eba teng lefatsheng lohle;
26 mme ha ho a ka ha eba eo Elia a rongwang ho yena, haese mosadi wa mohlolohadi wa Sarepta, naheng ya Sidone.
27 Le balepera ba bangata ba ne ba le teng Iseraeleng mehleng ya moporofeta Elisha, empa ha ho a ka ha eba e mong wa bona ya ntlafaditsweng, haese Naamane wa Mosiria.
28 Ba leng sinagogeng ba tlala bohale kaofela, ha ba utlwa dipolelo tseo.
29 Ba ema, ba mo lelekela kantle ho motse, ba mo isa selomong sa thaba eo motse wa bona o hahilweng hodima yona, ba re, ba ya mo dihela.
30 Empa yena a iphetela hara bona, a ikela.
31 Yaba o theohela Kapernauma, motse wa Galelea; mme o ne a ruta batho ka matsatsi a Sabatha.
32 Ba ne ba tsota thuto ya hae; hobane a ne a bua ka borena.
33 Monna o ne a le teng sinagogeng, ya nang le moya wa motemona o ditshila; a howa ka lentswe le leholo,
34 a re: Tloha! taba ya rona le wena ke efe, Jesu wa Nasaretha? Na o tlile ho re timetsa? Ke a o tseba hoba o mang: o Mohalaledi wa Modimo.
35 Jesu a kgalemela motemona, a re: Kgutsa, o tswe ho yena. Yaba motemona, hobane a mo dihele hare, a tswa ho yena, a sa mo ntshe kotsi.
36 Ba makala bohle, ba botsana, ba re: Lentswe lena ke eng, ha a kgalemela meya e ditshila ka borena le ka matla, mme e etswa?
37 Mme botumo ba hae ba utlwahala mathokong wohle a naha eo.
38 Yaba o tswa sinagogeng, a kena tlung ya Simone. Mohwehadi wa Simone o ne a tshwerwe ke febere e kgolo; ba mo rapella ho yena.
39 Jesu a inama hodima hae, a kgalemela febere, mme ya mo tlohela; mme a phakisa a tsoha, a ba sebeletsa.
40 Letsatsi ha le dikela, bohle ba nang le ba jewang ke malwetse a mefuta, ba ba tlisa ho yena; a bea matsoho a hae hodima e mong le e mong, a ba fodisa.
41 Le batemona ba tswa ho ba bangata, ba howa, ba re: Ke wena Kreste, Mora wa Modimo. Jesu a mpa a ba kgalemela, a se ke a ba dumella ho bua, kahobane ba ne ba mo tseba hobane ke yena Kreste.
42 Letsatsi ha le tjhaba, a tswa, a ya feelleng. Matshwele a mmatla. Mme ha ba mo fihlela, ba ne ba re, ba mo thibela hore a se ke a tloha ha bona.
43 A mpa a re ho bona: E ka kgona ke bolelle le metse e meng Evangeli ya mmuso wa Modimo; hobane ke rometswe hona.
44 Mme a nna a ruta masinagogeng a Galelea.