Luka

⁸Molemi a araba, a re ho yena: Morena, ako se lese ka sona selemo sena hape, nke ke se leme, ke se tshele ka moitedi. ⁹Ekaba se tla beha ditholwana; ha ho se jwalo, o tla se rema. ¹⁰O ne a ruta sinagogeng se seng ka Sabatha. ¹¹Mme bonang, mosadi o ne a le teng, ya kenweng ke moya o mo kudisitseng ka dilemo tse leshome le metso e robileng meno e le mmedi; o ne a futahane, a sitwa ho inamoloha le hanyenyane. ¹²Yare ha Jesu a mmona, a mmiletsa ho yena, a re: Mosadi, o lokolotswe lefung la hao! ¹³A ba a mmea matsoho. Yaba mosadi o phakisa a inamoloha, a rorisa Modimo. ¹⁴Empa mmusi wa sinagoge a hlonama ke hobane Jesu a fodisitse motho ka Sabatha, mme a bolella batho, a re: Matsatsi a tsheletse ao e ka kgonang ho sebetswe ka wona; le no tla ka wona ho tla fodiswa, e seng ka letsatsi la Sabatha.