Luka

²⁴Ba tla wa ka bohale ba sabole, ba iswe kgolehong ditjhabeng tsohle; mme Jerusalema o tla hatakelwa ke ditjhaba, ho be ho phethwe mehla ya ditjhaba. ²⁵Dipontsho di tla ba teng letsatsing, le kgweding, le dinaleding; le lefatsheng ditjhaba di tla tsieleha, di be le matswalo, lewatle le ntse le duma le maqhubu a lona. ²⁶Batho ba tla neela moya ke tshabo le ke tebello ya tse tla tla lefatsheng; hobane tse matla tsa lehodimo di tla sisinyeha. ²⁷Ke moo ba tla bona Mora motho a etla ka leru, ka matla le ka kganya e kgolo. ²⁸Etlare ha tseo di qala ho hlaha, emisang dihlooho, mme le lelale hodimo, hobane topollo ya lona e tla be e atametse. ²⁹A ba bolella setshwantsho, a re: Bonang sefate sa feiye le difate tsohle. ³⁰Ha le di bona di se di hlahisa mahlaku, le ye le tsebe le lona hoba lehlabula le haufi.