Luka

³⁷Hobane ke le bolella hore taba e ngodilweng e tshwanetse ho phethehala ho nna, e reng: O badilwe le bakgopo. Hobane ditaba tsa ka di ya ho feleng ha tsona. ³⁸Yaba ba re: Morena, bona, disabole tse pedi ke tsena. A re ho bona: Ho lekane. ³⁹Yaba o a tloha, a ya thabeng ya Mehlwaare, ka temalo ya hae; mme barutuwa ba hae ba mo latela. ⁴⁰Yare ha a fihlile teng, a re ho bona: Rapelang, hore le se kene molekong. ⁴¹A ntoo ya hojana le bona, sebaka se ka fihlewang ke lejwe ha le betswa; a kgumama ka mangwele a rapela, ⁴²a re: Ntate, hoja o ka rata ho suthisa senwelo sena pela ka! empa ho se ke ha etswa thato ya ka, ho etswe ya hao. ⁴³Yaba lengeloi le hlaha ho yena, le etswa lehodimong, la mo matlafatsa.