Luka

¹¹A araba, a re ho bona: Ya nang le dikobo tse pedi a abele ya se nang yona, le ya nang le dijo a etse jwalo. ¹²Balekgetho le bona ba tla ho kolobetswa, mme ba re ho yena: Moruti, re tla etsang na? ¹³a re ho bona: Le se ke la lefisa ho fetisa hoo le ho laetsweng. ¹⁴Masole le wona a mmotsa, a re: Le rona, re tla etsa eng? A re ho wona: Le se ke la etsa motho ka matla, leha e le ka thetso; hape le kgolwe ke moputso wa lona. ¹⁵Jwale, kahobane setjhaba se ne se dutse ka tebello, bohle ba hakanya ka dipelong tsa bona, ka ho re: Na mohlomong Johanne e ke se be ke yena Kreste, ¹⁶Johanne a ba araba bohle, a re: Nna, ke fela ke le kolobetsa ka metsi; empa e mong o a tla, ya mphetang ka matla, eo ke sa lokelang ho lokolla leqhwele la dieta tsa hae; ke yena ya tla le kolobetsa ka Moya o Halalelang le ka mollo. ¹⁷Seoloso sa hae se letsohong la hae, mme seotlo sa hae o tla se fiela ruri; o tla bokella koro modikong wa hae; haele mooko, o tla o tjhesa mollong o sa timeng.