Luka

³⁷Mme botumo ba hae ba utlwahala mathokong wohle a naha eo. ³⁸Yaba o tswa sinagogeng, a kena tlung ya Simone. Mohwehadi wa Simone o ne a tshwerwe ke febere e kgolo; ba mo rapella ho yena. ³⁹Jesu a inama hodima hae, a kgalemela febere, mme ya mo tlohela; mme a phakisa a tsoha, a ba sebeletsa. ⁴⁰Letsatsi ha le dikela, bohle ba nang le ba jewang ke malwetse a mefuta, ba ba tlisa ho yena; a bea matsoho a hae hodima e mong le e mong, a ba fodisa. ⁴¹Le batemona ba tswa ho ba bangata, ba howa, ba re: Ke wena Kreste, Mora wa Modimo. Jesu a mpa a ba kgalemela, a se ke a ba dumella ho bua, kahobane ba ne ba mo tseba hobane ke yena Kreste. ⁴²Letsatsi ha le tjhaba, a tswa, a ya feelleng. Matshwele a mmatla. Mme ha ba mo fihlela, ba ne ba re, ba mo thibela hore a se ke a tloha ha bona. ⁴³A mpa a re ho bona: E ka kgona ke bolelle le metse e meng Evangeli ya mmuso wa Modimo; hobane ke rometswe hona.