Luka

¹³Ba majweng, ke bao e reng ha ba utlwile, ba amohele lentswe ka thabo; empa bao ha ba na metso, ke ba dumelang ka mehla e seng mekae; mme ere mohla moleko, ba kwenehe. ¹⁴Tse wetseng meutlweng, ke ba utlwileng lentswe; empa ha ba ntse ba eya, ba pupetswa ke dipelaelo tsa lefatshe, le lerato la lefumo, le menyaka ya bophelo bona, mme ba se ke ba beha dijo. ¹⁵Mme tse wetseng mobung o motle, ke ba utlwileng lentswe ka dipelo tse ntle, tse molemo; ba le boloka, mme ba beha dijo ka tiisetso. ¹⁶Ha ho motho, ekareng ha a hoteditse lebone, ya le kwahelang ka pitsa, leha e le ho le bea tlasa malao; empa o le hloma kandelareng, hore ba kenang ba bone lesedi. ¹⁷Hobane ha ho letho le sephiring, le sa tlo ka le bonahala, mme ha ho letho le patilweng, le sa tlo ka le tsejwa le ho hlahela pepeneng. ¹⁸Ka baka leo, bonang kamoo le utlwang kateng; hobane ho tla newa ya setseng a ena le ntho; empa ya se nang letho o tla amohuwa le seo a lekanyang hoba o na le sona. ¹⁹Jwale, mmae le banababo ba tla ho yena; empa ba sitwa ho mo atamela ka baka la bongata.