1 Ra sokoloha, ra leba nqa lefeelleng ka tsela ya Lewatle le Lefubedu, kamoo Jehova a neng a mpoleletse kateng, mme ra potoloha thaba ya Seire ka ditshiu tse telele.
2 Jehova a mpolella, a re:
3 Le potolohile thaba ena nako e lekaneng; lebang nqa leboya.
4 O laele setjhaba, o re: Le a feta meeding ya banababo lona, bana ba Esau ba ahileng Seire, mme ba tla le tshaba. Iponeleng haholo ke hona;
5 le se ke la qabana le bona, hobane ha nka ke ka le nea letho naheng ya bona, leha e le sebaka se ka ka se ka hatwang ke leoto; hobane ke neile Esau thaba ye Seire, e be lefa la hae.
6 Le tla reka ho bona ka tjhelete dijo tseo le tla di ja; le tla ba lefa ka tjhelete bakeng sa metsi ao le tla a nwa.
7 Hobane Jehova, Modimo wa hao, o o hlohonolofaditse mesebetsing yohle ya matsoho a hao; o lemohile ho tsamaya ha hao lefeelleng leno le leholo; e se e le dilemo tse mashome a mane Jehova, Modimo wa hao, a leng ho wena, mme ha o a ka wa hloka letho.
8 Ra feta jwalo, ra kwekwetla banababo rona, bana ba Esau ba ahileng Seire, le tsela ya lehwatata, le Elathe, le Etsione-Gebere, ra ntoo fapoha, ra ya tsamaya ka tsela ya lefeella la Moabe.
9 Jehova a re ho nna: O se ke wa qala Bamoabe, mme o se ke wa ba lwantsha, hobane ha nka ke ka o nea letho naheng ya bona; kahobane ke neile bana ba Lota Are, hore e be lefa la bona.
10 (Baemime ba ne ba ahile teng pele; e ne e le setjhaba se seholo, se sengata, se boemo bo bolelele jwaloka ba Baanake.
11 Le bona ba ne ba tumile, ho thwe, ke Barefaime (diqhobane), jwaloka Baanake; empa Bamoabe ba ne ba ba bitsa Baemime.
12 Mohla monene Bahore ba ne ba ahile Seire, empa bana ba Esau ba ne ba ba falatse, ba ba qeta pela bona, mme ba aha tulong tsa bona, jwalokaha le bona Baiseraele ba entse lefatsheng leo ba le filweng ke Jehova.)
13 Emang jwale, mme le tshele nokana ya Serede. Mme ra tshela nokana ya Serede.
14 Haele dilemo tseo re nnileng ra tsamaya ka tsona, ho tloha Kadeshe-Barnea, ho isa tsatsing leo re tshetseng nokana ya Serede ka lona, ya eba dilemo tse mashome a mararo a metso e robileng meno e le mmedi, mofuta wohle wa bana ba ntwa o be o fele diahelong, kamoo Jehova a neng a ba hlapanyeditse kateng.
15 Efela letsoho la Jehova la nna la eba hodima bona hore le ba timetse diahelong, ho fihlela ba ba ba fela.
16 Eitse hobane banna bohle ba ntwa ba timele setjhabeng,
17 Jehova a bua le nna, a re:
18 Kajeno, o ya feta meeding ya Moabe, Are;
19 mme o tla atamela pela bana ba Ammone. O se ke wa ba qala, mme o se ke wa ba lwantsha; hobane ha nka ke ka o nea letho naheng ya bana ba Ammone; hobane ke e neile bana ba Lota hore e be lefa la bona.
20 [Le yona naha eo e ne e tumile, ka ho re, ke naha ya Barefaime; mohla monene Barefaime ba ne ba ahile ho yona; empa Baammone ba ne ba re, ke Basamsummime.
21 E ne e le setjhaba se seholo, se sengata, se boemo bo bolelele jwaloka Baanake. Jehova a ba fedisa pela bana ba Ammone; yaba bao ba ba lelekisa, mme ba aha tulong tsa bona.
22 Jehova o ne a etse jwalo le bakeng sa bana ba Esau ba ahileng Seire, mohla a fedisang Bahore pela bona, ba ba ba ba lelekisa; ba ile ba aha tulong tsa bona ho fihlela kajeno.
23 Haele Baavvime ba neng ba ahile metebong ho ya fihla Gasa, Bakaftorime ba tswileng Kaftore, ba ba fedisa, ba ba ba aha tulong tsa bona.]
24 Tlohang, le tsamaye, mme le tshele nokana ya Arnone. Bona, ke neetse Sihone, morena wa Heshbone, le Maomore, le naha ya hae, matsohong a hao. Qala ho hapa naha eo, mme o mo lwantshe.
25 Kajeno, ke tla qala ho tshollela ditjhaba tse katlasa lehodimo lohle tshoho le tshabo ya hao; etlere ha di utlwa botumo ba hao, di thothomele, mme di tsielehe pela hao.
26 Eitse ha re fihla lefeelleng la Kedemothe, ka romela manqosa ho Sihone, morena wa Heshbone, ka mantswe a kgotso, ka re:
27 A nke ke fete ka naha ya hao. Ke tla tsamaya ka tsela a bohle feela, ke sa fapohe ho ya ka letsoho le letona, leha e le ka ho le letshehadi.
28 Ke tla reka ho wena ka tjhelete dijo tseo ke tla di ja, mme o nnee ka tjhelete metsi ao ke tla a nwa; ke rata ho feta feela ka maoto a ka.
29 O nketsetse jwalokaha bana ba Esau ba ahileng Seire ba nketseditse, le jwaloka Bamoabe ba ahileng Are, ke be ke tshele Jordane, ke fihle lefatsheng leo Jehova, Modimo wa rona, a re neang lona.
30 Empa Sihone, morena wa Heshbone, a hana ho re nea sebaka sa ho feta ha hae; hobane Jehova, Modimo wa hao, o ne a thatafaditse moya wa hae, a sataladitse le pelo ya hae, hore a mo neele matsohong a hao, jwalokaha ho le jwalo kajeno.
31 Yaba Jehova o re ho nna: Bona, ke qadile ho neela Sihone le naha ya hae matsohong a hao. Qala ho hapa naha ya hae, o e rue.
32 Yaba Sihone o tswa le setjhaba sa hae, a re kgahlanyetsa Jahatse ka ntwa.
33 Jehova, Modimo wa rona, a re neela yena, mme ra mo hlola, yena le bana ba hae, le setjhaba sa hae kaofela.
34 Motsotsong oo, ra hapa metse yohle ya hae, ra e neela anathema, le banna, le basadi, le bana, re se ke ra tlohela le a mong ya phonyohang.
35 Feela ra ikgapela makgomo le thepa ya metse eo re e nkileng.
36 Ho qala ka Aroere, e lebopong la nokana ya Arnone, le motse o leng pela nokana, ho isa Gileade, ha ho a ka ha eba motse o re sitang. Jehova, Modimo wa rona, a re neela yona kaofela.
37 Haele naha ya bana ba Ammone, ha o a ka wa e atamela, leha e le lebopo lohle la nokana ya Jabboke, le metse e thabeng, leha e le sebaka sefe le sefe seo Jehova, Modimo wa rona, a neng a re hanetse ho atamela pela sona.