1 Etlere ha o futuhela dira tsa hao, mme o bona dipere, le makoloi, le batho ba o fetisang ka bongata, o se ke wa ba tshapa, hobane Jehova, Modimo wa hao, ya o ntshitseng naheng ya Egepeta, o na le wena.
2 Etlere ha le se le ya lwana, moprista a ke a atamele, a bue le setjhaba,
3 a re ho bona: Baiseraele, mamelang! Kajeno, le ya atamela dira tsa lona ho di lwantsha. Pelo tsa lona di se ke tsa fokola, mme le se tshabe, le se makale, mme le se tshohe ka baka la tsona;
4 hobane Jehova, Modimo wa lona, o tsamaya le lona ho le lwantshetsa dira tsa lona, le ho le namolela.
5 Bahlahlobi ba tla bua le setjhaba, ba re: Motho ke ofe ya hahileng ntlo e ntjha, mme ha a eso ho e kgakole na? A ke a tlohe, a kgutlele tlung ya hae, esere mohlomong a shwa ntweng, mme ya kgakolwa ke e mong.
6 Motho ke ofe ya hlomileng morara, mme ha a eso ho kge ditholwana tsa wona na? a ke a tlohe, a kgutlele tlung ya hae, esere mohlomong a shwa ntweng, mme ditholwana tsa wona tsa kguwa ke e mong.