1 Boporofeta hodima Egepeta: Bonang! Jehova o kaletse leru le bobebe, o lebile Egepeta; medimo ya Egepeta e thothomela pela hae, mme dipelo tsa Baegepeta di tepella ka ho bona.
2 Ke tla tsosa Moegepeta, a lwantshe Moegepeta, ba tle be lwantshane, motho a lwane le wa habo, motswalle le motswalle, motse le motse, mmuso le mmuso.
3 Kutlwisiso e tla tloha pelong tsa Baegepeta, ke tla fedisa morero wa bona; ke moo ba tla botsa ditaba ho ditshwantsho tsa medimo, le ho baupelli, le ho ba nyollang bafu, le ho dinohe.
4 Naha ya Egepeta ke tla e neha morena ya thata, e buswe ke morena ya thata: ho bolela Morena, Jehova wa makgotla.
5 Metsi a Nile a tla fela; noka e tla psha, e omelle.
6 Dinokana di tla nkga, meedi ya Egepeta e tla oma, e pshe; lehlaka le tla pona le wona moseme.
7 Makgulo a sikang le noka, a mabopong a noka, le masimo wohle a pela noka a tla omella, a foforehe, a fele.
8 Ba tshwasang dihlapi ba tla lla, bohle ba akgelang selope nokeng ba bokolle, ba dihelang letlowa hodima metsi ba tsielehe.
9 Ba sebetsang ka lene e ntle, le ba lohang masela a masweu, ba tla swaba.
10 Ditshiya tsa naha di tla robeha, bohle ba sebeletsang leruo ba hlomohe pelo.
11 Ruri, baholo ba Tsowane ke mahlanya feela; kelello ya baeletsi ba Faro e fetohile bowatla. Le ka bolela jwang ho Faro, la re: Ke nna mora wa ba bohlale, mora marena a kgale?
12 Ba kae jwale ba bohlale ba hao? Ba fele ba o bolelle, ho tle ho tsejwe seo Jehova wa makgotla a se rerileng hodima Egepeta.
13 Baholo ba Tsowane ba fetohile mahlanya, baholo ba Nofe ba thetsitswe, Egepeta e kgelositswe ke dihlooho tsa meloko ya yona.
14 Jehova o tshetse Egepeta ka moya wa modikwadikwane, hore ba tle ba kgelose Baegepeta diketsong tsa bona kaofela, jwaloka letahwa ha le diadielwa mahlatseng a lona.
15 Ha ho mosebetsi o ka thusang Egepeta, o entsweng ke hlooho, leha e le ke mohatla, kapa ke lekala la palema, kapa ke moseme.
16 Ka tsatsi leo, Baegepeta ba ya ba jwaloka basadi; ba tla tshoha, ba thothomele, ka baka la letsoho la Jehova wa makgotla le sisinyehang ho ba kgalemela.
17 Ke moo naha ya Juda e tla hlwenyetsa Baegepeta, mme lebitso la Juda ha le bolelwa bohle ba ya tshoha, ka baka la morero oo Jehova wa makgotla a o rerileng hodima bona.
18 Mohlang oo, metse e mehlano e tla ba teng Egepeta e tla bua puo ya Kanana, e ane ka Jehova wa makgotla; o mong ho yona o tla rewa Ire-Haherese (motse wa letsatsi).
19 Mehleng eo, Jehova o tla kgethelwa aletare bohareng ba lefatshe la Egepeta, mme sefika se kgethetsweng Jehova se tla ema pela meedi ya naha.
20 Hoo e tla ba pontsho le bopaki ba Jehova wa makgotla lefatsheng la Egepeta; hobane ba tla howeletsa ho Jehova ka baka la ba ba hlorisang, mme o tla ba romela mmoloki le moemedi, ya tla ba namolela.
21 Jehova o tla itsebisa Baegepeta, mme Baegepeta ba tla tseba Jehova mehleng eo, ba mo sebeletse ka mahlabelo le ka dinyehelo; ba tla itlama ka dikano ho Jehova, mme ba tla di phetha.
22 Jehova o tla otla Egepeta jwalo; o tla otla, a boele a fodise; ba tla sokolohela ho Jehova, mme o tla mamela thapelo tsa bona, a ba fodise.
23 Mehleng eo, mmila o tla ba teng o tswang Egepeta, o yang Assiria; Baassiria ba tla tla Egepeta, Baegepeta ba ye Assiria, mme Egepeta o tla sebeletsa Jehova a ena le Assiria.
24 Mohlang oo, Iseraele e tla ba wa boraro, ya kopaneng le Egepeta le Assiria, e be lehlohonolo bohareng ba lefatshe,
25 leo Jehova wa makgotla a tlang ho le hlohonolofatsa, a re: Ho hlohonolofale Egepeta, setjhaba sa ka, le Assiria, mosebetsi wa matsoho a ka, le Iseraele, lefa la ka!