Jeremia

Khaolo 17

BIBELE e Halalelang

¹Sebe sa Juda se ngodilwe ka moseto wa tshepe, ka daemane e ntjhotjho; se ngodilwe leqepheng la dipelo tsa bona le dinakeng tsa dialetare tsa bona. ²Jwalokaha ba hopola bana ba bona, ba hopola dialetare tsa bona jwalo le diashera tsa bona pela difate tse mahlaku, marallaneng a maleletsana. ³Thaba ya ka le masimo a yona, leruo la hao le matlotlo a hao kaofela, ke tla di neela kgapo, le tsona dinqalo tse diphahameng tsa hao, ka baka la sebe sa hao se meeding ya hao kaofela. ⁴Ka molato wa hao o tla senyehelwa ke lefa leo ke neng ke o neile lona; ke tla o etsa mofo wa bao e leng dira ho wena, lefatsheng leo o sa le tsebeng, hobane le tukisitse mollo wa kgalefo ya ka, o ya nne o tjhese ka ho sa feleng. ⁵Jehova o re: Ho rohakilwe motho ya itshepelang motho, ya etsang nama matla a hae, eo pelo ya hae e furaletseng Jehova. ⁶O jwaloka ya itlhophereng nahathothe, a sa bone hobane ho fihla molemo; o ahile dibakeng tse tshehla, lefatsheng le lebu, le sa ahuwang. ⁷Ho lehlohonolo motho ya itshepetseng Jehova, eo tshepo ya hae e leng Jehova. ⁸O jwaloka sefate se hlomilweng pela metsi, seo metso ya sona e namelang metsing; leha ho ka tla komello, ha se utlwe letho, le mahlaku a sona a ntse a le matala; le selemong sa letsatsi ha se tshabe letho, ha se lese ho beha ditholwana. ⁹Pelo e mano ho fetisa tsohle, e bodile hampe; e ka tsejwa ke mang? ¹⁰Ke nna Jehova ke lekolang pelo, ke lekang matheka, ke tle ke busetse ho e mong le e mong ka mokgwa wa hae le ka tholwana ya diketso tsa hae. ¹¹Ya bokellang maruo ka ho se loke, ke kgwale e alamang se sa beweng ke yona; mahareng a ditshiu tsa hae o ya a tlohela, ho feleng ha hae e tla ba lewatla. ¹²Esale ho qaleng, nqalo ya sehalalelo sa rona ke terone e phahamileng ya kganya. ¹³Tshepo ya Iseraele, Jehova ba o hlobohang kaofela ba ya hlabiswa dihlong. Ba nkwenehelang ba tla ngolwa lefatsheng, hobane ba hlobohile sediba sa metsi a phedisang, e leng nna Jehova. ¹⁴Oho Jehova, mphodise, ke tle ke fole; o mpholose, ke tle ke pholohe, hobane o thoko ya ka. ¹⁵Bona, bao ba re ho nna: Le kae lentswe la Jehova? A le ke le hlahe hle! ¹⁶Mme nna ha ke a ka ka ikganela hore ke se be modisa ya o salang morao; ha ke a ka ka lakatsa letsatsi la tlokotsi; wena o a tseba; se tswileng molomong wa ka se pontsheng ya sefahleho sa hao. ¹⁷O se ke wa ba letsoso ho nna; o setshabelo sa ka tsatsing le lebe. ¹⁸Ba ntlhorisang ba ke ba hlabiswe dihlong, empa nna ke se ke ka hlabiswa dihlong, ba ke ba tlakasele, empa nna ke se ke ka tlakasela. Ako ba hlahisetse tsatsi le lebe, o ba hatakele ka ho hatakela habedi.

Ho kgethwe tsatsi la Sabatha.

¹⁹Jehova a ba a mpolella, a re: Eya, o eme monyako wa bana ba setjhaba, oo marena a Juda a kenang ka wona le ho tswa ka wona; o eme le menyakong yohle ya Jerusalema; ²⁰mme o re ho bona: Mamelang lentswe la Jehova, marena a Juda, le Bajuda bohle, le baahi kaofela ba Jerusalema ba ntseng ba kena ka menyako ena. ²¹Ho itswe ke Jehova: Itebelleng meya ya lona, le se ke la jara diphahlo ka tsatsi la Sabatha, le se ke la di tsamaisa ka menyako ya Jerusalema. ²²Le se ke la ntsha phahlo matlung a lona ka tsatsi la Sabatha; le se ke la etsa mosebetsi leha o le mong; le mpe le kgethe letsatsi la Sabatha kamoo ke laetseng bontata lona kateng. ²³Empa ha ba ka ba utlwa leha e le ho sekeha ditsebe, ba ile ba satalatsa melala, hore ba se ke ba utlwa, ba se ke ba amohela thuto. ²⁴Ekare ha le nkutlwa, ho bolela Jehova, le sa tsamaise phahlo ka menyako ya motse ona ka tsatsi la Sabatha, le sa etse mosebetsi leha o le mong ka lona, ²⁵ho tla nne ho kene ka menyako ya motse ona marena a lona le mahosana a lona a ituletseng teroneng ya Davida, a kene ka makoloi, a palamile dipere, e le wona le baholo ba setjhaba, le batho ba Juda le baahi ba Jerusalema; mme motse wona o tla nne o ahuwe ka ho sa feleng. ²⁶Ba tla tloha metseng ya Juda, le mathokong a Jerusalema, le naheng ya Benjamine, le lehwatateng, le thabeng, le nqeng ya borwa, ba tlise ditjheso, le mahlabelo, le dinyehelo, le dibano, ba tlise le dineo tsa diteboho ka tlung ya Jehova. ²⁷Empa ha le hana ho nkutlwa, ha ke le laela ho boloka letsatsi la Sabatha, le ho se jare diphahlo, le ho se di kenye ka menyako ya Jerusalema ka tsatsi la Sabatha, ke tla besa mollo menyakong ya motse, o tle o tjhese matlo a borena a Jerusalema, mme ha o ka ke wa tingwa.

Khaolo

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52